Fýtboldan Qazaqstan ulttyq quramasynyń bas bapkeri Stanıslav Cherchesov qyzmetinen ketetini belgili boldy.
«Bul sheshim jańa basshylyqtyń bastamasymen qabyldandy. Quramaǵa jańa bapker retinde eki jergilikti jáne eki eýropalyq mamannyń kandıdatýrasy qarastyrylýda. Qazirgi ýaqytta zańgerler kelisimshartty zańdy túrde toqtatý joldaryn zerdelep jatyr», – dep habarlaıdy E.Maulen telegram-arnasy.
Stanıslav Cherchesov Qazaqstan quramasyn 2024 jyldyń shilde aıynda basqarǵan bolatyn. Onyń kelisimsharty 2026 jylǵy Álem chempıonatynyń irikteý kezeńiniń sońyna deıin jasalǵan.
Cherchesovtyń jetekshiligimen Qazaqstan quramasy segiz resmı oıynnyń jetide jeńilip, bireýinde teń tústi. Komanda Avstrıa, Norvegıa jáne Slovenıa quramalarymen bir topta óner kórsetken Ulttar lıgasynda sońǵy oryn aldy.