Soltústik Qazaqstan oblysy Aqqudyq eldi mekeniniń mańynda 36 tonna dızel otynyn tıegen benzovoz jolda aýdarylyp qaldy, dep habarlaıdy Almaty-akshamy.kz QazAqparat-qa silteme jasap.
SQO polısıa departamenti baspasóz qyzmetiniń málimetinshe, jol-kólik oqıǵasy keshe 5 maýsym kúni saǵat 16.20 shamasynda Taıynsha aýdany Aqqudyq eldi mekeniniń mańynda bolǵan. Aýylǵa burylysqa 10 shaqyrym jetpeı «VOLVO» júk kóliginiń júrgizýshisi rúlge ıe bola almaı qalyp, mashınany aýdaryp alǵan. Onyń joldyń shetindegi jyraǵa túsip ketýine dóńgeleginiń isten shyǵýy sebep bolýy múmkin. Kólikti Nur-Sultan qalasynyń 30 jastaǵy turǵyny basqarǵan. Ol Ýálıhanov aýdany Kishkenekólden astanaǵa 36 tonna dızel otynyn apara jatqan eken. Jol-kólik apaty jaıynda polıseılerge kolonnada kele jatqan basqa júrgizýshiler habarlaǵan.
Oqıǵa ornyna patrúldi polısıa batalónynyń, jergilikti polısıa qyzmetiniń, ákimshilik polısıa jáne tótenshe jaǵdaılar bóliminiń mamandary jetti.
«Júk kóligindegi suıyq otyndy basqa mashınaǵa quıyp alyp, VOLVO-ny júk tıegishpen kóterip shyǵardyq. Saǵat 23.00 shamasynda órt sóndirýshilermen birge kólikti Aqqudyq aýylyna jetkizip saldyq. Benzovoz júrgizýshisi 7 saǵat boıy jolda júrdi», - deıdi SQO PD patrúldik polısıa batalónynyń ınspektory Saqtıar Ashmadárov.