8 naýryz – Halyqaralyq áıelder kúni qarsańynda Týrızm jáne sport mınıstrligi sportshylardyń analaryn shýaqty merekemen quttyqtady.
Vedomstvo basshysy Ermek Marjyqpaev el abyroıyn álemdik arenada laıyqty qorǵap júrgen azamattardy tárbıelegeni úshin alǵysyn bildirdi, dep habarlaıdy almaty-akshamy.kz.
«Árbir adamnyń ómirinde ananyń orny bólek. Sportshylar da anaǵa arqa súıeıdi. Balalaryn jattyǵýǵa da aparatyn, rýhanı qoldaý kórsetetin de analar. Sondyqtan sportshynyń anasy bolý – úlken eńbek jáne mamandyq dep te aıtýǵa bolady. Sizderdiń bala tárbıesindegi rólińizdi sózben jetkizý qıyn jáne sizder de sportshylar sıaqty kez kelgen qurmet pen marapatqa laıyqsyzdar. Óıtkeni balalaryńyz bıik shyńdy baǵyndyrý úshin kóp nárseni qurban ettińizder, degenmen, sonyń óteýi retide búginde osyndaı keremet maqtanysh pen qýanyshqa bólenip otyrsyzdar. Ana – kez kelgen sportshynyń eń birinshi jankúıeri, eń jaqyn dosy, adal tálimgeri jáne, árıne, eń qymbat adamy. Qamqorlyq pen tárbıeniń, balańyzdyń qabiletine degen senimniń arqasynda sizder naǵyz chempıondardy ósire aldyńyzdar. Barshańyzdy kóktemniń osy bir shýaqty merekesi – Halyqaralyq áıelder kúnimen shyn júrekten quttyqtaımyn!», - dedi Ermek Marjyqpaev.
Kezdesý barysynda Týrızm jáne sport mınıstri Memleket basshysy Q.Toqaevtyń shahmattan Halyqaralyq Grosmeıster Sádýaqasova Dınarany quttyqtaý hatyn anasy Óteshova Oral Mahmetqyzyna tabystady. Sonymen qatar, is-sharaǵa qatysqan qurmetti meımandarǵa alǵys hat pen estelik syılyq tabystaldy. Óz kezeginde, analar rızashylyǵyn bildirip, elimizdegi barsha áıel qaýymyn merekemen quttyqtady. Sondaı-aq sportshylarymyz halyqaralyq baıraqty básekelerdegi ónerimen tek óz ata-analaryn ǵana emes, elimizdiń barsha jankúıerin qýantýǵa tilektes ekendigin jetkizdi.
