Sybaılas jemqorlyqqa qarsy qyzmette Agenttik Tóraǵasy A. Jumaǵalıdiń basshylyǵymen sportty qarjylandyrý salasyndaǵy jemqorlyq táýekelderin joıý máseleleri boıynsha vedomstvoaralyq májilis ótti, dep habarlaıdy almaty-akshamy.kz
Májilis jumysyna Agenttik Tóraǵasy A. Jumaǵalımen birge Týrızm jáne sport mınıstri E.B. Marjyqpaev, Ulttyq olımpıadalyq komıtetiniń prezıdenti G.G. Golovkın, Astana qalasynyń ákimi J.M. Qasymbek, qarjy jáne sıfrlandyrý vıse-mınıstrleri, «Samuryq-Qazyna» AQ basshylyǵy, qoǵam qaıratkerleri, ortalyq jáne óńirlik memlekettik organdar qatysty.
Elimizde sportty damytýǵa bólinetin memlekettik qarajattyń utymsyz jáne tıimsiz jumsalýyna ákep soqtyratyn eleýli jemqorlyq táýekelderi men faktorlarynyń bolýyn kórsetken syrtqy taldaý nátıjeleri talqylandy.
Agenttik aǵymdaǵy jyldyń basynan beri sport salasynda 39 jemqorlyq qylmysyn tirkedi.
Beıindi mınıstrlik ishindegi jemqorlyqtyń aýqymy qazirgi ýaqytta burynǵy vıse-mınıstr, Sport jáne dene shynyqtyrý isteri komıtetiniń tóraǵasy, Sportty damytý dıreksıasynyń basshysy jáne basqa da laýazymdy tulǵalardyń qylmystyq jaýapkershilikke tartylýyna ákeldi.
Ult densaýlyǵyn nyǵaıtý jáne buqaralyq, ásirese balalar sportyn damytý máselelerine memleket basshysy erekshe kóńil bóledi.
Tek sońǵy 6 jylda osy saladaǵy búdjet 2 esege ósip, 1,4 trln teńgeni qurady.
Alaıda, Qazaqstannyń álemdik sporttaǵy reıtıńi tómendeýde.
Osy sala búdjetiniń 90%-y jumsalatyn «joǵary jetistikter» jáne «buqaralyq» sportty qarjylandyrý arasynda teńgerimsizdik baıqalady.
Al damyǵan elderde proporsıalar múldem ózgeshe jáne buqaralyq sportqa qarajat bólý basym.
«Qarjylandyrýdaǵy dısproporsıa jemqorlyq sqemalaryna negiz boldy. Eger buqaralyq sportta qazir sıfrlandyrylǵan jan basyna shaqqandaǵy qarjylandyrý baǵdarlamasy jumys istep tursa, onda joǵary jetistikter sportynda ashyq emes jáne sýbektıvti tólemder, az baqylaý, affılırlengen qatysýshylar, jalǵan oqý-jattyǵýlar jáne qosarlanǵan qarjylandyrýǵa jaǵdaı jasalǵan», – dep atap ótti Agenttik Tóraǵasy.
Sporttyq prosesterde sıfrlandyrýdyń bolmaýy jemqorlyq quqyq buzýshylyqtar men qarajattardyń jymqyrylýyna qolaıly.
Eki jyl buryn josparlanǵan «E-sport» aqparattyq júıesi osy ýaqytqa deıin iske qosylǵan joq. «Sport sheberleri» jalǵan ataqtaryn berý faktileri anyqtaldy.
Májiliste Qazaqstandaǵy sportshylardy natýralızasıalaý, kásibı klýbtardyń búdjetterin qalyptastyrý jáne legıonerlerge tólemderdi qarjylandyrý máseleleri talqylandy.
El Prezıdentiniń búdjet pen jalaqy mólsherin shekteý jónindegi tapsyrmasyna qaramastan, elimizdiń fýtbol kásipodaq klýbtary sońǵy 3 jyl ishinde 30 mlrd teńgeden astam ústeme aqy tóledi.
Sonymen qatar, óziniń sporttyq ınfraqurylymyn damytýdyń ornyna búdjet qarajaty legıonerlerge tólem jasaýǵa jáne sport nysandaryn jalǵa alýǵa jumsaldy.
Taldaý qorytyndysy boıynsha Agenttik salalyq mınıstrliktiń atyna jemqorlyq táýekelderin joıý boıynsha usynymdar engizdi.
Vedimistik baqylaýdy kúsheıtý jáne dıskresıalyq ókilettikterdi qysqartý, qarajatty bólý prosesterin naqty normatıvtik jáne quqyqtyq reglamentteýdi belgileý jáne buzýshylyqtar úshin jaýapkershilikti derbestendirý, sondaı-aq biryńǵaı sıfrlyq platforma qurý týraly suraqtar qoıyldy.
Óz sózinde Týrızm jáne sport mınıstri E.B. Marjyqpaev memlekettik organnyń qazirgi ýaqytta uıymdyq-quqyqtyq sharalar keshenin qabyldaǵany týraly habardar etip, jemqorlyq táýekelderin joıý boıynsha barlyq usynymdardyń mindetti túrde oryndalatyndyǵyn aıtty.
Ulttyq olımpıadalyq komıtetiniń prezıdenti G. Golovkın: «Meniń ustanymym birjaqty jáne meniń sporttyq mansabym da ózgerissiz qalady – jemqorlyqqa múldem tózbeýshilikti qalyptastyryp, onyń kez kelgen kórinisterine qatań sharalar qoldaný qajet», - dep atap ótti.
Keńes qorytyndysy boıynsha Sybaılas jemqorlyqqa qarsy vedomstvonyń basshysy ýákiletti organdardy eldegi sportty damytý jónindegi tikeleı mindetterdi múltiksiz oryndaýǵa shaqyrdy jáne jemqorlyq buzýshylyqtardyń jasalýyna jol bermeý týraly eskertti.
Sóz sońynda A. Jumaǵalı qazaqstandyq sportshylarǵa aldaǵy olımpıadada tabys tiledi.