Elimizde balalar-jasóspirimder sport mektepteriniń mamandandyrylǵan bólimsheleriniń, olımpıadalyq rezervtiń mamandandyrylǵan mektep-ınternat-kolledjderiniń, daryndy balalarǵa arnalǵan sport mektep-ınternattardyń pedagogterine, jattyqtyrýshy-oqytýshylaryna biliktilik sanaty úshin qosymsha aqy tólene bastady, dep habarlaıdy Almaty-akshamy.kz.
Mádenıet jáne sport mınıstrliginiń málimetinshe, pedagog-moderator biliktilik sanaty úshin laýazymdyq eńbekaqynyń 30% mólsherinde, pedagog-sarapshyǵa — laýazymdyq eńbekaqynyń 35%, pedagog-zertteýshige – 40% jáne pedagog-sheber biliktilik sanaty úshin — laýazymdyq eńbekaqynyń 50% mólsherinde ústemeaqy tólenedi.
Elimizde dene shynyqtyrý jáne sport salasynda 66 myńnan astam maman jumys isteıdi. Olardyń arasynda oqytýshylar, jattyqtyrýshylar, ádiskerler jáne basqa da qyzmetkerler bar. Onyń ishinde mamandardyń shamamen 42%-y nemese 28 myńnan astamy aýyldyq jerlerde qyzmet atqarady.
«Elimizde buqaralyq sport pen dene shynyqtyrýdy damytý - maman daıarlaýmen jáne sala qyzmetkerleriniń biliktiligin arttyrýmen tikeleı baılanysty. Jyl saıyn 2 myńǵa jýyq mektep túlegi joǵary oqý oryndaryna «Dene shynyqtyrý jáne sport» mamandyǵy boıynsha qabyldanady. Búgingi tańda ýnıversıtetterdiń bilim berý baǵdarlamalary jańartylyp, olarǵa «Sport menedjmenti», «Sport psıhologıasy», «Densaýlyq menedjmenti», «Sporttyq quqyq», «Sporttyq medısına», «Sport jýrnalısıkasy» jáne basqa da jańa pánder qosyldy», dedi Mádenıet jáne sport vıse-mınıstri Sársen Quranbek.