Almatynyń Kók bazarynda fılıppındik blogerge aǵylshyn tilinde erkin sóılep, kádesyı satqan balanyń vıdeosy jelini jardy. Az ǵana ýaqyt ishinde 3 mıllıonǵa jýyq qaralym jınaǵan vıdeodaǵy bala - Nurjol Satybaldy. Aqshamnews.kz tilshisi jeli juldyzyna aınalǵan balany taýyp, tildesip qaıtty.
Sýret: Almaty-akshamy.kz.
Nurjoldyń jelide jarq etý joly
Nurjol - Talǵar aýdany, Besaǵash aýylyndaǵy №45 mektep-gımnazıasynyń 8-synyp oqýshysy. 14 jastaǵy jetkinshek sabaqtan tys ýaqytta ata-anasynyń saýda kásibine kómektesip turady. Vırýsqa aınalǵan vıdeodan keıin Nurjoldyń áleýmettik jelidegi oqyrmandary kóbeıip, kórgen jurt jyly lebizin jaýdyrǵan.
Ol aǵylshyn tilin tájirıbede jıi qoldanatynyn, bazarǵa sheteldik týrıserdiń jıi kelip turatynyn aıtty.
"Jelide tanymal bolǵan vıdeo ótken aptanyń demalys kúnderiniń birinde túsirilgen bolatyn. Ol týrısiń bloger ekenin bilmedim. Qolyndaǵy kamerasyn baıqadym, biraq jelige salǵan soń jurt osyndaı reaksıa bildiredi dep oılamadym. Ádette Kók bazarǵa týrıser jıi keledi. Olarmen osylaı aǵylshynsha tildesip saýda jasaı beremin. Men úshin qalypty jaǵdaı bolyp ketken. Jalpy shetelge shyqqanda, kúndelikti ómirde aǵylshyn tiliniń kerek ekenin túsindim. Solaısha kýrstarǵa jazylyp, mektepte de aǵylshyn tilin qyzyǵyp oqı bastadym. Qatty bilemin dep aıta almaımyn, biraq osylaı kúnde tájirıbede paıdalanyp turamyn" deıdi Nurjol.
Sýret: Almaty-akshamy.kz.
"Qazaqtyń bir sózin bolsyn úırenip ketse eken dedim"
Nurjol vıdeo sońynda týrıske "raqmet" sózin úıretýin de túsindire ketti.
"Ózge til tirlik úshin, óz tiliń birlik úshin" degen sóz bar ǵoı. Sol sekildi meniń bul vıdeodaǵy týrıske qazaqsha alǵys aıtýdy úıretkenim - qazaqtyń bir sózin bolsyn bilip júrse eken dedim. Menińshe naǵyz patrıot bolý, ultyńdy súıý osyndaı kishigirim dúnıelerden bastalady" deıdi ol.
Sýret: Almaty-akshamy.kz.
"Bolashaqta áýejaı qyzmetkeri bolǵym keledi"
Nurjol qazir óz aýylyndaǵy fýtbol klýbynyń qaqpashysy. Aıaq dobyn hobbı etken jasóspirim keleshekte áýejaıda jumys istegisi keletinin aıtty.
"Hobbıim- fýtbol oınaý. Óz aýylymdaǵy "Suńqar" fýtbol klýbynyń qaqpashysymyn. Jıi jarystarǵa shyǵyp, júldeger bolyp turamyz. Biraq bolashaqta ápkem sekildi áýejaı qyzmetkeri bolǵym keledi. Shetelderge jıi shyǵyp, tanymymdy arttyryp, álemdi aralaǵym keledi" deıdi Nurjol.