Semeıde kópqabatty úı podezinde bolǵan oqıǵa túsirilgen vıdeo birneshe kúnnen beri áleýmettik jelide qyzý talqylanyp jatyr, dep habarlaıdy Aqshamnews.kz tilshisi.
Beınejazba avtory Arýjan esimdi boıjetkenniń aıtýynsha, ol tańǵy 04:00 shamasynda jumystan úıine oralǵan. Podezdiń kireberis esigin asha bergen sátte artynan belgisiz qyz erip kirgen. Podezge kirer kezde belgisiz qyz urys shyǵaryp, Arýjannyń birinshi kirgenin talap etken.
"Túnde mundaı jaǵdaı bolady dep oılamadym. Qyz balasy bolǵan soń qoryqpaımyn dep te oıladym. Alaıda onyń áreketi men agresıasy shoshytty. Meniń vıdeoǵa túsirip turǵanymdy kórgende ol basqasha sóıleı bastady. Baıqap júrińizder", - deıdi vıdeodaǵy qyz.
Abaı oblysynyń polısıa departamenti bul faktige qatysty tergeýdi bastaǵan.
"Anyqtalǵandaı, 2026 jylǵy 25 qańtar kúni saǵat 03:21 shamasynda Semeı qalasyndaǵy Qaraǵaıly yqsham aýdanynda ornalasqan úılerdiń biriniń podezi mańynda eki azamatsha arasynda aýyzsha janjal shyqqan. Janjal barysynda 24 jastaǵy boıjetken beıádep sózder aıtyp, qoǵamdyq tártipti buzǵan. Oqıǵaǵa qatysqan barlyq tulǵalar anyqtalyp, túsinikteme alyndy. Atalǵan derek boıynsha 24 jastaǵy azamatshaǵa qatysty usaq buzaqylyq jasaǵany úshin ákimshilik is qozǵaldy", - delingen habarlamada.
Áleýmettik jelidegi pikirlerde Qaraǵaıly aýdanynyń turǵyndary bul qyzdyń túngi ýaqytta podezderde júrip, qabattardy aralaıtynyn aıtyp, buǵan deıin túsirilgen basqa vıdeolardy da jarıalaǵan. Keı jazbalarda qyzdyń anasy onyń bilimdi ekenin, shetelde oqyǵanyn aıtyp, «eshqandaı aýytqý baıqamaǵanyn» jetkizgeni de aıtylady. Oqyrmandar arasynda jaǵdaıǵa alańdaýshylyq bildirip, tıisti organdar tarapynan qosymsha tekserý qajet ekenin jazǵandar bar.