Qazaqstan-Portýgalıa machynda ulttyq qurama fınalǵa sál-aq jetpeı qaldy
Lıtvanyń Kaýnas qalasynda ótken fýtzaldan álem chempıonatynyń jartylaı fınalynda Qazaqstan quramasy joǵary dárejedegi oıyn kórsetti. Atalǵan mach aıaqdopshylar men jankúıerlerdiń túrli emosıany bastan keshirgen tartysty sátterine toly boldy, dep habarlaıdy Almaty-akshamy.kz.
Tartysty ótken kezdesý oıyn basynan-aq shıelenisken sátterge toly boldy. Oıynnyń nebári úshinshi mınýtynda otandyq fýtbolshymyz Birjan Orazov esep ashqan. Alaıda tóreshiler onyń bul golyn VAR-dy qaraý nátıjesinde esepke almady.
Alma-kezek shabýyldarǵa ıek artqan komandalar birinshi taımdy teń eseppen aıaqtady. Oıyndaǵy birinshi goldy 23-mınýtta portýgalıalyq Panı soqty. Esepti teńestirýge umtylǵan bizdiń oıynshylar qarsylastar qaqpasyn jıi mazalady. Jigeri jasymaǵan oıynshylarymyz aqyrynda oıyn aıaqtalýǵa sanaýly sekýndtar qalǵanda esepti teńestirip, kezdesý taǵdyryn qosymsha taımdarda sheshý múmkindigin aldy. Gol avtory - Nurǵojın.
Ekstra-taım bastalǵanyna kóp ótpeı, bizdiń oıynshymyz Dýglas aıyp dobyn birden qaqpaǵa baǵyttap, esepti alǵa shyǵardy. Jeńilip jatqan Portýgalıa quramasy da baryn sala otyryp, kezdesý aıaǵynda Brýný Koelúdiń kómegimen esepti teńestire aldy. Oıyn taǵdyry penaltı serıasynda sheshildi. Penaltıde Dýglas ı Arnold Knaýb múlt ketip, Qazaqstan jeńilis tapty. Oıyn esebi 4:3-pen aıaqtaldy
Endi jeksenbi kúni el quramasy álem chempıonatynyń qola júldesi úshin Brazılıamen kezdesedi.