19 qańtarda QR Oqý-aǵartý mınıstrligi mektepterdegi sońǵy qońyraý kúnin keıinge shegergen bolatyn.
Oqý-aǵartý mınıstrligi sońǵy qońyraý kúnin 25 mamyrǵa qaıtarý máselesin qarastyrýy múmkin, dep habarlaıdy Almaty-akshamy.kz
2023 jylǵy 7 naýryzda Úkimet kýlýarynda QR Oqý-aǵartý mınıstri Ǵanı Beısembaev sarapshylar qaýymdastyǵy sońǵy qońyraý kúnin 25 mamyrda qaıtarý múmkindigin talqylaıtynyn málim etti.
Mınıstr qabyldanǵan sheshimdi birden ózgerte salý ońaı bolmaıtynyn atap ótti.
"Kóptegen ata-ana 25 mamyrdy qaıtarýdy usynyp jatyr. Sheshim qabyldap, bıyl birden ózgertý ońaı emes. Bul muǵalimderdiń saǵaty men oqý materıalynyń josparlanǵan kólemi sıaqty aldyn ala qabyldanǵan oqý baǵdarlamalaryna áser etedi. Biraq, jalpy, men komandama taǵy da oqý jónindegi qaýymdastyqty jınap, túsindirý jumystaryn júrgizýdi nemese naqty sheshim qabyldaýdy tapsyrdym. Bul baǵyttaǵy jumystar bastalyp ketti. Biraq qabyldanǵan sheshim bıyl iske asyrylady", - dedi Ǵanı Beısembaev.
Ol sheshimdi sarapshylar qaýymdastyǵy qabyldaıtynyn, talqylaýǵa ata-analar da qatysýy múmkin ekenin aıtty.
19 qańtar kúni QR Oqý-aǵartý mınıstrligi mektepterdegi sońǵy qońyraý kúni keıinge shegerilgenin málimdedi. 2023 jyldan bastap 1 maýsymda elimizdiń oqýshylary Halyqaralyq balalardy qorǵaý kúnimen qatar sońǵy qońyraý merekesin atap ótedi.