Qos el arasynda vızasyz rejım engizilgen soń Qazaqstan azamattary Qytaıǵa jıi bara bastaǵan. Bul týraly Syrtqy ister mınıstrliginiń resmı ókili Aıbek Smadıarov aıtty, dep habarlaıdy almaty-akshamy.kz.
«Byltyr 10 qarashada kúshine engen eki el arasyndaǵy kelisim óz nátıjesin berip jatyr. Statısıkaǵa súıensek, 2023 jylǵy 10 qarashadan beri Qazaqstanǵa 126 myń Qytaı azamaty kelgen. Sondaı-aq osy ýaqyttan beri Qytaıǵa 173 myń qazaqstandyq barǵan. Ózim de 2 kún buryn Qytaıǵa baryp keldim. Ushaqtyń bárinde tolǵan Qazaqstan azamattary. Surastyrsań, kóbi týrıs. Mysaly, 1-2 ata-anany kórdim. Olar balalaryn (Qytaıda) oqytý úshin ýnıversıtet qaraýǵa bara jatyr eken. Sondyqtan mádenı gýmanıtarlyq baılanys nyǵaıyp keledi. Prezıdenttiń jáne syrtqy ister mınıstriniń sapary da óte sátti ótti dep oılaımyn», - dedi resmı ókil.
Eske salaıyq, 2023 jyldyń qarashasynda Qazaqstan men Qytaı arasynda vızasyz rejım kúshine endi. Eki taraptyń kelisimine sáıkes, Qytaı jáne Qazaqstan azamattary kórshi elde shekaradan ótken kúnnen bastap 30 kúnge deıin vızasyz bola alady. Jalpy 180 kún ishinde vızasyz 90 kúnnen artyq júre almaıdy.
«2023 jylǵy 10 qarashada Qazaqstan úkimeti men Qytaı úkimeti arasyndaǵy vızalyq talaptardan ózara bosatý týraly kelisim kúshine endi. Osy kelisimniń 1-shi babyna sáıkes, eki eldiń azamattary jeke isterdi, týrızmdi, em qabyldaýdy, halyqaralyq tasymaldardy, tranzıttik, sonymen birge iskerlik maqsattardy júzege asyrý úshin vızalyq talaptardan bosatylady. Osy rette azamattardyń eki memleket aýmaǵynda bolý merzimi kúntizbelik 30 (otyz) kúnnen aspaıtyn merzimdegi kezeńge, al kúntizbelik 180 (júz seksen) kún ishinde jıyntyǵynda kúntizbelik 90 (toqsan) kúnnen aspaýy qajet», dep jazylǵan Qazaqstan SİM-niń habarlamasynda.