Elimizde 200 myńǵa jýyq azamat qumar oıyndar men bás tigýden óz erkimen bas tartty.
Týrızm jáne sport mınıstrliginiń málimetinshe, ótken jyly iske qosylǵan júıe qazir oń nátıje kórsetýde. Býkmekerlik keńseler men kazınolar, qumar oıyn saıttarynan ózin shekteıtinder qatary artyp keledi, dep habarlaıdy aqshamnews.kz.
Mundaı sheshimge kelgenderdiń deni - jastar. Sondaı-aq, jańa júıege ata-analar tarapy da jıi júginetin bolǵan.
Elde 400 myńǵa jýyq adam býkmekerlik keńseler men kazınolardyń turaqty tutynýshylaryna aınalǵan. Búginde elde oıynǵa táýeldilerdi tegin emdeıtin 20 memlekettik mekeme bar.
Altynaı Tókenqyzy, QR DSM «Respýblıkalyq densaýlyq ǵylymı-praktıkalyq ortalyǵy» bas dırektory:
Negizi bizde 20 emdeý mekemesi bar. Ol psıhıkalyq ortalyqtar, sonda em alýǵa bolady. Jáne qosymsha ońaltý ortalyqtar jumys isteıdi. Ol bizde 6 eresekterge arnalǵan jáne 6 balalarǵa arnalǵan ońaltý ortalyqtary bar.
Sońǵy 3 jylda qazaqstandyqtar qumar oıyndarǵa 1 trln tg jumsaǵan. Qazir memleket lýdomanıamen kúresti kúsheıtti. Byltyr 3 jyldyq keshendi jospar qabyldanǵan. Sodan beri 187 myńnan astam adam qumar oıynnan óz erkimen bas tartqan.
Abdel Baltategi, QR Týrızm jáne sport mınıstrliginiń basqarma basshysy:
Negizi óz-ózin shekteý boıynsha eki jolmen jumystar jasaýǵa bolady. Ol E-qyzmet pen E-ótinishpen arqyly bizdiń komıtetimizdiń atyna ótinish jazyp, shekteýge bolady. Jáne eGov qosymshasy arqyly onlaın shekteý qoıýǵa bolady. 6 aıdan - 10 jylǵa deıin. Jáne ol ótinish qaıtarylmaıdy. Basqa adamdar da sot arqyly balalaryna, týysqandaryna shekteý qoıa alady.
Qazir kóshelerde, úılerdiń qasbeti men kólikterdiń syrtynda býkmekerlik keńselerdi jarnamalaýǵa tyıym salynǵan. Odan bólek, nesıesin 90 kúnnen astam ýaqyt tólemeı júrgen, alıment pen salyqqa qaryzy 3 mln-nan asqan azamat bás tige almaıdy. Oǵan qosa, 300 myńǵa jýyq áskerı men memlekettik qyzmetshiler oıyn bıznesinen shettetildi.