Soltústik Qytaıdyń basym bóliginde aptap ystyq ornady. Eldiń osy aımaqtaryndaǵy qolaısyz aýa raıyna baılanysty qyzǵylt sary deńgeıdegi tótenshe jaǵdaı jarıalandy, dep habarlaıdy Almaty-akshamy.kz QazAqparat-qa silteme jasap.
QHR ulttyq meteorologıalyq ortalyǵynyń málimetinshe, Beıjiń, Tánszın jáne Hebeı, Shansı, Shensı (Soltústik Qytaı) provınsıalarynda seısenbi kúni termometr 35 gradýstan joǵary kóterildi, al Hebeı provınsıasynyń keıbir aýdandarynda +40 belgisinen asyp ketti. Qytaı sınoptıkteri kútiletin aptap ystyqqa baılanysty eldiń soltústik óńirleri turǵyndaryna fızıkalyq belsendilik pen kóshede bolý ýaqytyn azaıtýdy usyndy. Aýa raıynyń tosyn syıyn Szánsı provınsıasynyń turǵyndary da bastan ótkerdi, onda ótken dúısenbide nóserli jańbyrdan keıingi sý tasqyny saldarynan eń joǵary, qyzyl, qaýiptilik deńgeıi jarıalandy. Osy provınsıanyń 485 myńǵa jýyq turǵyny apat saldarynan zardap shekti. Qytaıda tabıǵı apattar týraly tórt deńgeıli halyqty eskertý júıesi bar, ol kók, sary, qyzǵylt sary jáne qyzyl.