Respýblıka Saraıynda Qazaqstan kárister qaýymdastyǵynyń uıymdastyrýymen «Solnal-2023» jańa jyl merekesine arnalǵan merekelik jıyn ótti.
Atalmysh mereke qystyń aıazdy kúnderine dál kelgenimen, jylylyqqa toly. Bul kúndi tek bizdiń elimizdegi ǵana emes, búkil dúnıe júzindegi koreıler asyǵa kútedi. Eńkeıgen káriden eńbektegen balaǵa deıin bul kúni bir-birine jyly sóz aıtyp, keń peıildilik tanytady. Kópten kórispegen jandardaı bir-birimen saǵynysyp, ystyq kóńilmen qaýyshyp, merekeniń mańyzyn tipti arttyra túsedi. Bul kúni aıtýly merekeni atap ótýge eresektermen birge búldirshinder de keldi.
Aı kúntizbesiniń birinshi kúnine dál kelgen bul mereke - koreı halqynyń dástúrli meıramdarynyń biri. Jalpy, Almatyda atalmysh mereke 1989 jyldan beri atap ótilip keledi.
Alǵashqy sóz kezegin alǵan Almaty qalasynyń ákimi Erbolat Dosaev merekege arnaıy kelgen qonaqtar men qala turǵyndaryn ystyq yqylaspen quttyqtady.
"Solnal – jańarýdyń, tazalyqtyń jáne jaqsylyqqa degen úmittiń sımvoly. Ol jaqsylyqtyń, aqıqattyń jáne ádilettiliktiń saltanat qurýyn bildiredi. Mereke bárimizdi ıgi isterge, izgilikke, baýyrmaldylyqqa shaqyrady. Shyǵys Jańa jylynyń bastalýy - ár adamnyń ómirindegi óte mańyzdy oqıǵa. Mereke jańarý, jasarýmen qatar barshamyzdy jaqsylyqqa úndep, dostyq baılanysty nyǵaıtýǵa kómektesedi, jaqsylyq pen ózara syılastyqqa úıretedi", - dedi shahar basshysy.
Kelesi kezekte Qazaqstan koreıler qaýymdastyǵynyń tóraǵasy Iýrıı Shın sóz alyp, Qazaqstanda barlyq etnostarǵa, sonyń ishinde koreı mádenıeti men ádebıetin damytý úshin barlyq jaǵdaılardyń jasalǵanyn atap ótti.
Qazaqstan koreıler qaýymdastyǵy tóralqasynyń múshesi, «Kore ılbo» gazetiniń bas redaktory Konstantın Kım óz kezeginde qazaqstandyq koreıler dástúr boıynsha týǵan mádenıeti, ádet-ǵurpy týraly bilimderin urpaqtan-urpaqqa jetkizetinin aıtty.
Bıylǵy jyly merekede 500-ge jýyq jeke oryndaýshylar men shyǵarmashylyq ujymdar óner kórsetti. Olardyń qatarynda QR Halyq ártisi Roza Rymbaeva, respýblıkalyq memlekettik akademıalyq koreı mýzykalyq komedıa teatrynyń ártisteri, Almaty koreı ulttyq ortalyǵynyń ujymdary jáne shaqyrylǵan ártister bar.
Merekelik konsertke dástúrli koreılik hanbok kostúmimen kelgen árbir adamǵa Qazaqstan koreıler qaýymdastyǵynan erekshe syılyq tabys etildi. Respýblıka saraıynyń keń zalynda dástúrli Koreı jármeńkesi ótip, onda ulttyq kádesyılar, kosmetıka jáne koreı ónimderi satyldy.