Azyq-túlik ınflásıasy 20,5 prosentke jetken.
Al saýda komıtetiniń tóraǵasyn qyzmetinen bosatpaq, dep habarlaıdy Almaty-akshamy.kz úkimettiń resmı resýrsyna silteme jasap.
Premer-mınıstr Álıhan Smaıylov áleýmettik mańyzy bar azyq-túlik baǵasynyń sharyqtaýyna baılanysty ákim orynbasarlaryn tártiptik jazaǵa tartýdy, al saýda komıtetiniń tóraǵasyn qyzmetinen bosatýdy tapsyrdy, dep habarlaıdy Sputnik Qazaqstan úkimettiń resmı saıtyna silteme jasap.
Bıyl on aıdyń qorytyndysy boıynsha azyq-túlik ınflásıasy 20,5 prosentke jetken. Sońǵy bir aptanyń ishinde sábiz, kartop, qant pen qyryqqabat birshama arzandasa da, jumyrtqa, un, kúrish pen sút taǵy qymbattap ketti.
Premer-mınıstrdiń aıtýynsha, baǵa tizbegin tergeý jónindegi óńirlik komısıalardyń jumysynan áli de nátıje joq.
«Bul ákimdikterdiń álsizdigin jáne aýyl sharýashylyǵy, saýda jáne ıntegrasıa mınıstrlikteriniń jumysty úlestire almaı otyrǵanyn kórsetedi. Óz mindetin tıisinshe oryndamaǵany úshin óńir ákimderiniń osy salaǵa jaýapty orynbasarlaryn tártiptik jaýapkershilikke tartýdy tapsyramyn», dedi Smaıylov.
Sondaı-aq úkimet basshysy saýda jáne ıntegrasıa mınıstrligine laýazymdy tulǵalardy tártiptik jaýapkershilikke tartýǵa, al saýda komıtetiniń tóraǵasyn qyzmetinen bosatýǵa tapsyrma berdi.