Memleket basshysy Premer-Mınıstr Álıhan Smaıylovty qabyldady, dep habarlaıdy Almaty-akshamy.kz Inform.kz-ke silteme jasap.
Qasym-Jomart Toqaevqa onyń saılaýaldy baǵdarlamasyn iske asyrý úshin júrgizilip jatqan jumystar men josparlar, Úkimettiń ekonomıkalyq saıasaty, sondaı-aq ınflásıany tómendetý, munaı-gaz jáne energetıka salalaryn, óńdeý ónerkásibin, aýyl sharýashylyǵyn, kásipkerlikti jáne ekonomıkanyń basqa da sektorlaryn damytý sharalary jóninde egjeı-tegjeıli aqparat berildi.
Álıhan Smaıylov 44 retteý salasynda bızneske kedergi keltiretin 10 myńǵa jýyq talapty joıý jáne qaıta qaraý, shaǵyn jáne orta bıznestegi jumyspen qamtylǵandar sanyn 3,8 mıllıon adamǵa deıin arttyrý, 38 myń jumys ornyn asha otyryp, quny 4,2 trıllıon teńge bolatyn 289 jańa ınvestısıalyq jobany iske asyrý, birqatar iri ınfraqurylym nysanyn salý jáne basqa da jumystardy atqarý kózdelip otyrǵanyn jetkizdi.
Sonymen qatar Prezıdent Úkimettiń ishki naryqty otandyq óndiris taýarlarymen qamtamasyz etý, azyq-túlik taýarlarynyń turaqtandyrý qorlarynyń qyzmetin qaıta jasaqtaý, jańa formattaǵy mektepter salý, aýyldyq densaýlyq saqtaý nysandaryn jańǵyrtý, azamattardy jumyspen qamtý jáne basqa da josparlarymen tanysty.
Budan bólek, Premer-Mınıstr eksportty, naqty jalaqyny jáne jalpy ekonomıkanyń ósimin arttyrýdy, sondaı-aq ınflásıany tómendetýdi qamtıtyn respýblıkanyń áleýmettik-ekonomıkalyq damýyna qatysty aldaǵy jylǵa arnalǵan boljamyn jetkizdi.
Memleket basshysy Úkimetke saılaýaldy baǵdarlamany oryndaý jóninde keshendi sharalar qabyldaýdy, sondaı-aq memlekettiń makroekonomıkalyq josparlary men áleýmettik mindettemelerin iske asyrýdy tapsyrdy.
Prezıdent Úkimetke elimizde qolaıly ınvestısıalyq jáne bıznes-ahýaldy qamtamasyz etý, ınflásıa deńgeıin tómendetý, densaýlyq saqtaý salasyndaǵy jaǵdaıdy jaqsartý, jylytý maýsymynyń barysyn erekshe baqylaýda ustaý jóninde birqatar mindet júktedi.