351 jyljymaıtyn múlik nysany zardap shekti
Premer-mınıstr Álıhan Smaıylov Úkimettiń Sıfrlyq keńsesinde ortalyq memlekettik organdardyń basshylarynyń jáne óńirler ákimderiniń qatysýymen Prezıdent Qasym-Jomart Kemeluly Toqaevtyń osy jyldyń basynan beri bergen tapsyrmalaryn iske asyrý jóninde keńes ótkizdi, dep habarlaıdy Almaty-akshamy.kz Premer-mınıstrdiń baspasóz qyzmetine silteme jasap.
Elde oryn alǵan tártipsizdikter kezinde 351 jyljymaıtyn múlik nysany zardap shekti, olardy jóndeý-qalpyna keltirý jumystaryn júrgizý qajet. Onyń ishinde 8 óńirdegi 45 memlekettik organ ǵımaraty jáne 306 komersıalyq nysan bar. Olar Almaty, Shymkent qalalarynda, Almaty, Jambyl, Qyzylorda, Atyraý, Aqtóbe jáne Shyǵys Qazaqstan oblystarynda.
Bızneske aldyn ala keltirilgen shyǵyn mólsheri 98,1 mlrd teńgeni quraıdy, onyń 97%-y Almaty qalasyna tıesili.
Á. Smaıylov Indýstrıa jáne ınfraqurylymdyq damý mınıstrligine óńirlerdiń ákimdikterimen birlesip, belgilengen merzimde búlingen ǵımarattardy tehnıkalyq-saraptamalyq tekserýden ótkizý jáne jóndeý qunyn baǵalaý jumystaryn aıaqtap, qajetti qujattamany Qarjy mınıstrligine engizýdi tapsyrdy.
Tártipsizdikterden keltirilgen zalaldy baǵalaý jónindegi úkimettik komısıaǵa jergilikti atqarýshy organdarmen birlesip, zalaldy baǵalaýdy jedel aıaqtaý jáne zardap shekken bıznes sýbektileriniń tizimi men olarǵa keltirilgen zalal kólemin Ulttyq ekonomıka mınıstrligine jiberý tapsyryldy.
«Úkimet apta saıyn zardap shekken kásipkerlerge jedel kómek kórsetý úshin qarajat bólý boıynsha qajetti sharalardy júrgizýge daıyn», — dedi Á. Smaıylov.
Úkimet basshysy kómir baǵasynyń ósýine jol bermeýdiń mańyzdylyǵyn atap ótip, bul máseleni kómir óndirýshi kompanıalarmen pysyqtaýdy, sondaı-aq kómir tasymaldaý tarıfteriniń negizsiz ósýine jol bermeý úshin taldaý júrgizýdi tapsyrdy.
«Keıbir kompanıalardyń kirme joldar men tuıyq joldardaǵy qyzmet kórsetý tarıfi joǵary, olardy qaıta qarastyrý qajet», — dedi Á. Smaıylov.