Mektep bitirýshi túlekter úshin sheshýshi sát – Biryńǵaı Ulttyq testileý bastalǵaly da eki aptadan asty. Bir anyǵy, qazir test tapsyrý erejesi, jón-jorasy áldeqaıda jeńildedi.
Synaqtan qaı kúni, qaı jerde ótkisi keletinin talapker ózi tańdaıdy jáne burynǵydaı bir-aq ret emes, testti eki qaıtara tapsyryp, grantqa sonyń ishindegi úzdik nátıjesimen qatysa alady. Al ótken jylǵa deıin túlekter bir-aq ret baq synaıtyn da, nátıjesi tómen bolyp qalsa búkil ómir sonymen bitkendeı saly sýǵa ketetin. Qalaı bolǵanda da, synaqtyń aty – synaq. Talapkerdiń ózi de, ata-anasy da birinen biri ótip qobaljıtyny, alańdaıtyny belgili.
Almatydaǵy Qazaq ulttyq ýnıversıteti aýmaǵyndaǵy test ortalyǵyna jol túskende oǵan kózimiz jete tústi. Top-tobymen júrgenderdiń bir bóligi – talapkerlerdiń ata-anasy men jaqyndary bolsa, endi bir bóligi – synaq tapsyrýǵa kirip ketkenderge qoldaý bildirýge kelgen jankúıer ustazdary, dostary. Ata-analardyń júzinen bir mazasyzdyq baıqalady. «Qyzym ǵoı, tuńǵyshym. Týǵanda bir ret qınalyp edim, búgin ekinshi ret tolǵatyp, qatty tolqyp turmyn», – deıdi orta jastaǵy bir kelinshek. «Alla balalarymyzdyń baǵyn ashsyn! Ne uıqy, ne kúlki joq, qanshama ýaqyttan beri kóz maıyn taýysyp daıyndalǵan eńbekteri aqtalsa eken! – deıdi taǵy biri.
Mektepten bólek, balalardy testke daıyndaıtyn ortalyq mamandary da: «Biz saǵan senemiz!», «Juz 40 senimen birge!» degen plakattar kóterip, ortalyq mańaıynda júr. Belgilengen ýaqyt bitip, talapkerler birtindep shyǵa bastaǵanda kópshilik qaýym nazary birden solarǵa aýdy. «Qansha bal?», «qalaı boldy?», «qıyn bolǵan joq pa?» degen suraqtar tus-tustan jaýyp jatyr. Bir jaqsysy, qazir ár bala óziniń jınaǵan balyn birden bilip shyǵady eken. Kópshiligi kóńildi. «115», «120», «130» degen daýystar jarqyn-jarqyn shyǵady. «Meniń balym 108 bolyp qaldy» dep jylamsyrap turǵan qyzdyń synyptastary bolýy kerek, eki ul bala: «bizge de solaı, 108 alyp qaldyq dep jylaýdy jazsyn» dep kúlip jatyr. Qalaı bolǵanda da, áli ekinshi márte tapsyryp kóretin múmkindikteri bar ekenin barlyǵy biledi, sony aıtyp, ózderi bir-birin jubatyp ta qoıady.
Test ortalyǵy aýmaǵynda uıaly telefon baılanysy buǵattalǵandyqtan, talapker sińlimniń habaryn bile almadym. QazUÝ mańaıynan uzap baryp habarlasqanda onyń erterek tapsyryp qaıtyp ketkenin, nátıjesi óte jaqsy bolǵanyn estidim. Ózin kórip, quttyqtap qaıtaıyn dep KFC-ge tapsyrys berip qoıyp, kútip turǵam...
«Siz Glovosyz ba?..» degen daýys jalt qaratty. «Iá, ıá» deıdi satýshy ústeliniń aldynda turǵan jas bala. Qulaǵy úırengeni sonsha, «Glovo» degen ataý quddy óziniń tól esimine aınalyp ketken sıaqty. Basyndaǵy dýlyǵa sıaqty úlken kaskadan bet-júzi kórinbeıdi de. Arqasynda óziniń dene turqynan eki ese qomaqty sary sómke. Eńkeıgende ıilgen qyldyryqtaı moıny men balań ıyǵyna sómkeniń aıtarlyq kúsh túsirip turǵany kórer kózge baıqalyp-aq tur. Aıaǵynda – saptama etik. Al dalada – kún shyjyp tur... Ol qazir tapsyrysty alady da, mopedke mine sala, qala kóshelerindegi qaınaǵan kólik tyǵynynyń ara-arasymen zýlap kete barady. Qanshama qaýip, qanshama qater!..
Al kósheniń arǵy betinde osy balamen qatarlas jastar jarqyn bolashaqqa talpynyp, jaqsy nátıje kórsetýge tyrysýda. Qaı-qaısysy da eńbegi janyp, maqsatyna jetse eken. Taýy shaǵylsa olardyń da kez kelgeni búgingi arman-muraty túgil, atyn da, zatyn da umytyp, kúnderdiń kúninde «Glovoǵa» aınalyp ketpesine kim kepil?!