Uzaq ýaqytqa sozylǵan karantınnen keıin Almaty sırki súıikti kórermenderine esigin qaıtadan aıqara ashty. Qazaq memlekettik sırki aty ańyzǵa aınalǵan qazaq balýany, sırk artısi Qajymuqan Muńaıtpasovtyń 150 jyldyǵyna arnalǵan «HELLO CIRCUS» atty jańa baǵdarlamasyn usyndy.
Sırktiń bul baǵdarlamasyna Qazaq memlekettik sırkiniń biregeı nómirleri men juldyzdary qatysty. Atap aıtsaq, kúshtik atlet, darshylar, orys taıaqshasyndaǵy gımnastar, ekvılıbrıser, lopıngtegi vóltıjer-akrobattary, áýe gımnastary, úıretilgen ıtter, attar! Barlyq nómirlerdi kórermender bir orynda tapjylmastan, qol shapalaqtap qyzyǵa tamashalady.
Qazaqstan Respýblıkasynyń eńbek sińirgen qaıratkeri, Dúnıejúzilik kaskaderler akademıasynyń (AQSH) «Taýrýs» syılyǵynyń ıegeri J.Kýngýjınovtyń jetekshiligimen «Nomad» toby atty-akrobatıkalyq jattyǵýlarymen kópshilikti tánti etti. Atty-akrobatıkalyq qoıylymda attyń qulaǵynda oınaıtyn shabandoz jigitter balaqaılardyń jylqy malyna degen qyzyǵýshylyǵyn oıatyp, erekshe qoshemetke bólendi. Monte-Karloda ótken IX Halyqaralyq «Jańa býyn» sırk óneri festıvaliniń kúmis júldegeri, HH Halyqaralyq «Shabyt» shyǵarmashyl jastar festıvaliniń birinshi oryn ıegeri, «Azıa jańǵyryǵy» VI Halyqaralyq sırk óneri festıvaliniń altyn júldegeri Anna Demıdova óner kórsetip, joǵary deńgeıde sahnalanǵan qyzyqty qoıylymdarmen kórermenderge qýanysh syılady. Kórermen demin ishine tarta otyryp tamashalaǵan qoıylymnyń biri tanymal qazaqstandyq sportshy, armrestlıngten halyqaralyq sport sheberi, ekstremaldy kúshtik sport túrlerinen birneshe rekordtardyń ıegeri, mas-restlıng Álem Kýboginiń ekinshi oryn jeńimpazy Tımýr Sypataevtyń qoıylymy boldy. Ol 25 keli turatyn qylyshty op-ońaı sermep, ártúrli jattyǵýlar jasaǵanda, kórermender shýlap ketti. Odan keıin batyrdyń tórt jaǵynan tórt atty kelip, arqanmen tartqan kezde onyń naǵyz Qajymuqannyń izbasary ekenine kóz jetkendeı boldy. Kúsh atasy Qajymuqannyń jolyn jalǵap, halyqaralyq arenada jetistikke jetip júrgen atlet alǵash ret qala turǵyndarynyń aldynda ónerin kórsetti. Ol osyǵan deıin 400 kelilik túıeni kóterip, rekord ornatqan bolatyn.
«Atamyzdyń 150 jyldyǵyna oraı arnaıy shaqyrylyp kelip jatyrmyz. Qanshama temirdi maıystyrý ońaı emes, atamyz jasaǵan trúktar kóp. Atalarymyzdyń salǵan sara jolyn urpaq bop jalǵastyrý – bizdiń paryzymyz», – dedi Qazaq memlekettik sırkiniń ártisi Tımýr Sypataev.
Al «Beldikterdegi áýe gımnastary» nómirindegi qoıylymdy sahnalaýda esh qoryqpaǵan qos arý – Ýhan qalasynda ótken Hİ Halyqaralyq sırk óneri festıvaliniń kúmis júldegeri, VII Halyqaralyq «Azıa jańǵyryǵy» sırk óneri festıvaliniń Gran-prı ıegeri Marına Starodýbova men Daıana Jetpisovaǵa kórermender shapalaqty aıamaı soqty. Ýchao men Ýhandaǵy Halyqaralyq sırk óneri festıválderiniń qola júldegeri Tımýr Korjýmbaevtyń jetekshiligimen «Úıretilgen ıtter» nómirinen kishkentaı kórermenderdiń alǵan áseri men qýanyshy erekshe boldy. Búldirshinder sahnadaǵy ártisterdiń óneri men ıtterdiń qımyl-qozǵalysyn súısine tamashalady. Ásirese, ortaǵa kóńildi saıqymazaqtar shyqqanda, keremet kóńil kúıge keneldi. Balalarmen baılanys ornatyp, qyzyqty suraqtar qoıý arqyly olar sırk ishin kishkentaılardyń syńǵyrlaǵan kúmis kúlkisine toltyrdy. İshek-silesi qatyp ábden kúlip alǵannan keıin, kórermenderdi tańqalarlyq shoý kútip turdy. Hanchjoýda ótken halyqaralyq ıllúzıalyq óner festıvaliniń altyn júldegeri Lázzat Baıtoqanovanyń qoıylymy rasymen balaǵa da, úlkenge de tańsyq dúnıe boldy. Jarq-jurq etken arýdyń qysqa ǵana ýaqyttyń aralyǵynda kórermenniń kóz aldynda 8 kóılekti qalaı aýystyryp úlgergenin túsine almaı ań-tań qaldy.
Svetnoı býlvardaǵy Iý.Nıkýlın sırki, Máskeý halyqaralyq jastar sırk óneri festıvál-baıqaýynyń jáne II Mınsk sırk óneri festıvaliniń qola júldegerleri Ádilet Tıkanovtyń jetekshiligindegi jańa «Qos qytaı machtasy» nómiri, Ravıl Seıdgarıevtyń jetekshiligindegi «Darshylar», Qazaq memlekettik sırkiniń bı-akrobatıkalyq balet jáne basqa da jarqyn sırk nómirleri men kóńildi reprızalar da qalyń kópshiliktiń ystyq qoshemetin aldy.
- Almaty sırkiniń shyǵarmashylyq ujymy óz kórermenderimen bul kezdesýdi kópten kútti, sırk artıseri jeliden tys jáne oflaın-rejımde talmaı jumys jasady. Bir jarym jyldan bergi demalys bolǵan kezde de eshqandaı artıs qarap jatqan joq. Óıtkeni, sırk artısiniń ómiri sport sıaqty. Kúnde shıratylyp, tartylǵan rezeńkedeı bolyp, samdaǵaılyǵy, kúshtiligi bolmasa, ol óz formasyn joǵaltyp alady. Sondyqtan artıserdiń barlyǵy bir jarym jyldyń ishinde, qatań karantın bolǵan kezde úılerinde daıyndaldy. Biz óz sırkimizde almatylyqtardy jáne ońtústik astananyń qonaqtaryn, sırk óneriniń barlyq baǵalaýshylaryn úlken qýanyshpen kútemiz. Kórermenderdi bas aınalatyn trúkter, tańǵajaıyp sıqyr, janýarlar, rıasyz kúlki kútýde,– dedi Qazaq memlekettik sırkiniń dırektory Baqyt Bókebaı.
Ártúrli janrdaǵy qoıylymdar kópten saǵynyp kelgen balalardy da, ata-analardy da bir sátke zeriktirmedi. Qoıylymnyń qyzyqty ótýine atsalysyp, boıyndaǵy bar ónerin salǵan sırk ártisteri almatylyq kórermenderdiń ystyq yqylasyna bólendi. Aqyldy janýarlar, tań-tamasha qaldyratyn trúkter, jarqyn kúlki, tańǵajaıyp ózgerýler jáne jaǵymdy emosıalar sıaqty sırktiń sıqyryna kelgen ónersúıer qaýym rıza bolyp qaıtty. Qazaq memlekettik sırkindegi erekshe baǵdarlamamen daıyndalǵan bul qoıylymdardyń qyzyǵyn almatylyq kórermender 15 shildege deıin tamashalaı alady.