Almaty qalalyq jedel shuǵyl kómek kórsetý aýrýhanasyna (QJSHKKA) 60 jastaǵy naýqas sol kóziniń shyǵyńqylyǵy, qyzarýy jáne qozǵalysynyń shektelýine shaǵymdanyp tústi. Dárigerlik tekserý nátıjesinde óte sırek kezdesetin dıagnoz – kózdiń arterıovenozdy fıstýlasy anyqtaldy.
QJSHKKA neırohırýrg mamany Maksım Argýmbaevtyń aıtýynsha, bul aýrýdyń álemde sońǵy 30 jyl ishinde bar bolǵany 42 jaǵdaıy ǵana tirkelgen.
"Aýrýdyń qaýpi – ekzoftalmanyń (kózdiń shyǵyńqylyǵynyń) údemeli damýynda. Ol kórý qabiletin joǵaltýǵa nemese tipti kóz almasyn alyp tastaýǵa májbúrleıtin jaǵdaıǵa ákelýi múmkin", – dep atap ótti dáriger.
Arterıovenozdy fıstýla – arterıalar men tamyrlar arasyndaǵy qan aǵymynyń buzylýyna ákeletin patologıalyq baılanys.
Naýqastyń emdelýin otalyq brıgada – neırohırýrgıa bólimshesiniń meńgerýshisi Konstantın Lı, neırohırýrg Maksım Argýmbaev, anestezıolog Rınat Qasenov, jáne otalyq medbıke Elmıra Aıýpova júzege asyrdy. Komanda kózdegi fıstýlaǵa kúrdeli rentgenoendovaskýlárlyq embolızasıa otasyn sátti jasady.
Ota uzaqtyǵy bar bolǵany 60 mınýtty qurady.
Komanda músheleriniń joǵary kásibı biliktiligi men úılesimdi jumysynyń arqasynda naýqastyń kórý qabileti saqtalyp qaldy. Otadan keıingi dınamıkada aıtarlyqtaı jaqsarý baıqaldy: kózdiń shyryshynyń (hemoz) regresi oryn alyp, kózdi tolyq jabý qabileti qalpyna keltirildi.
"Mundaı ota kórý qabiletin saqtap qalýǵa qatysty joǵary qaýippen birge júredi. Biz naýqasqa kómektese alǵanymyzǵa, zamanaýı tehnologıalar men komanda tájirıbesin qoldanǵanymyzǵa qýanyshtymyz. Bul jaǵdaı dárigerlik kómekke erte júginý men kásibı kózqarastyń mańyzdylyǵyn aıqyn kórsetedi", – dep túıindedi Maksım Argýmbaev.