Soltústik Qazaqstan oblysynda polısıa esirtki jasyrýmen aınalysqan qurbylardy ustady, dep habarlady Polisia.kz.
Petropavl qalasyndaǵy Jumysshy kentinde SQO PD esirtki qylmysyna qarsy is-qımyl basqarmasynyń qyzmetkerleri sıntetıkalyq esirtki taratty degen kúdikpen Toyota RAV4-de otyrǵan 2 áıeldi ustady. Onyń biri – 33 jastaǵy qala turǵyny. Ol zańsyz jolmen aqsha tabýdyń sońy nemen aıaqtalatynyn jaqsy bilgen. Sebebi 2022 jylǵy qyrkúıekte onyń kúıeýi osyndaı qylmys jasaǵany úshin sottalyp, qazir túrmede jazasyn ótep jatyr.
Toyota RAV4 kóliginiń ishinde kúdiktiniń 36 jastaǵy qurbysy otyrǵan. Ol da ustaldy.
Áıelderdi jáne olardyń turǵylyqty mekenjaıyn tintý kezinde 700 gramnan asatyn untaq tárizdi jáne kesektelgen zat tárkilendi. Saraptama nátıjesi onyń α-PvP (tuz) sıntetıkalyq esirtki ekenin kórsetti. Sondaı-aq esirtkini býyp-túıýge arnalǵan materıaldar da tárkilendi.
Bul derek Qylmystyq kodekstiń 297-baby 3-bóligi boıynsha sotqa deıingi tergep-tekserýlerdiń biryńǵaı tizilimine tirkeldi. Búginde 33 jastaǵy qala turǵyny qamaýǵa alyndy, tergeý júrip jatyr. Kúdiktiler bul qylmyspen shamamen 4 aı aınalysqan, – dedi SQO PD EQQİQB basshysy Rýslan Saparov.
Polısıa esirtkini asa iri kólemde ótkizgeni úshin 10 jyldan 15 jylǵa deıin bas bostandyǵynan aıyrý jazasy qarastyrylǵanyn eskertedi.