Jergilikti qyzǵaldaq gúli shet eldi tańdandyrýda
Sıngapýrde Qazaqstan Táýelsizdiginiń 30 jyldyǵyna arnalǵan qyzǵaldaqtar kórmesi ótti, dep habarlaıdy Almaty-akshamy.kz Qazaqtv.com saıtyna silteme jasap.
Munda alǵash ret qazaqtyń kıiz úıi tigildi. Nur-Sultan sheberleri jasaǵan kıiz úıdi kórmege ushaqpen jetkizgen. Sondaı-aq Qazaqstandaǵy Qoja Ahmet Iassaýı kesenesiniń kóshirmesi de jurt nazaryna usynyldy.
Iaǵnı kórme qonaqtary gúlderdi tamashalap qana qoımaı, qazaqtyń dástúri jáne mýzykasymen de jaqyn tanysty. Atalmysh kórmege Sıngapýr mınıstri Indranı Radja da keldi. Bul el Qazaqstanmen qarym-qatynastaryn joǵary baǵalaıdy.
Elimiz derbestik alardan birneshe aı buryn eki memleket basshylary arasynda jaqsy baılanys ornaǵan bolatyn.
«Qazaqstan men Sıngapýr arasyndaǵy qatynastar barlyq salada qarqyndy damyp keledi. Al onyń bastamasy osydan 30 jyl buryn Sıngapýrdiń alǵashqy Premer-Mınıstri Lı Kýan Iýdyń Almatyǵa jasaǵan tarıhı sapary kezinde qalandy. Sol kezde ol Qazaqstannyń Tuńǵysh Prezıdenti Nursultan Nazarbaevpen kezdesti», - dedi Qazaqstannyń Sıngapýrdegi tótenshe jáne ókiletti elshisi Árken Arystanov.
Sondaı-aq, kórmege tek vaksına saldyrǵan adamdarǵa kelýge ruqsat etildi. Ol qazannyń 14-ne deıin jalǵaspaq. Kórmeni eldiń 200 myńdaı turǵyny tamashalaıdy.