...Memleket árqashan qoldarynan ustap júre almaıdy - SİM ókili
Vedomstvoda ótken brıfıńide BAQ ókilderi mınıstrliktiń resmı ókili Aıbek Smadıarovtan Túrkıanyń Alanıa qalasynda jol apatynan qaıtys bolǵan bir otbasynyń 3 múshesine qatysty sońǵy málimetti surady, dep habarlaıdy Almaty-akshamy.kz QazAqparatqa silteme jasap.
«Ol otbasy músheleriniń múrdeleri Qazaqstanǵa jetkizildi. Árıne, qazir tergeý júrgizilip jatyr. Eki kólik soǵysqan, júrgizýshileri tergelýde. Advokattar bar. Konsýlymyz olardyń týǵan-týystarymen, Túrkıanyń jergilikti quqyq qorǵaý organdarymen tyǵyz baılanysta. Azamattarymyz Túrkıada demalyp jatsa, qandaı da bir ekskýrsıaǵa ne basqa jerge baratyn bolsa, óz qaýipsizdigin qamtamasyz etýi kerek. Olardyń janynda memleket árqashan qoldarynan ustap júre almaıdy», - dedi Aıbek Smadıarov.
Onyń atap ótýinshe, Syrtqy ister mınıstrligi atalǵan otbasy músheleriniń múrdelerin elge jetkizý úshin jan-jaqty kómek kórsetken.
Esterińizge sala ketsek, 4 qyrkúıek kúni Túrkıanyń Alanıa qalasynda safarı-kólik pen jeńil avtomobıldiń soqtyǵysýy saldarynan jýrnalıs, «Zeıin Atyraý» erekshe balalardy ońaltý ortalyǵynyń negizin qalaǵan Araılym Baǵytjan men 2 jasary qyzy oqıǵa ornynda qaıtys boldy.
Birneshe kúnnen keıin aýrýhananyń jansaqtaý bólminde jatqan otbasynyń otaǵasy dakóz jumdy.