Almatyda 27 jastaǵy er adam kópqabatty turǵyn úı kesheninde esirtki zerthanasyn uıymdastyrǵan.
Sıntetıkalyq esirtkini shyǵaratyn zerthana Almatynyń Bostandyq aýdanynda ornalasqan turǵyn úı keshenderiniń birindegi eki bólmeli páterde jumys istep turǵan, dep habarlaıdy Almaty-akshamy.kz.
27 jastaǵy Ý.esimdi azamat “sıntetıka” óndirý úshin turǵyn úıdi arnaıy jalǵa alǵandyǵy belgili boldy.
– Tintý kezinde bizdiń bólimshe qyzmetkerleri medısınalyq shprıster, qolǵaptar, lakmýs qaǵazy, jasyl tústi ızolenta, prekýrsorlar men tuz qyshqyly bar ydystar, arnaıy zerthanalyq shyny ydystar, elektrondy tarazylar jáne sıntetıkalyq psıhotroptyq zat mefedron óndirisinde qoldanylatyn basqa da quraldardy tárkiledi. Sondaı-aq daıyn ónim – krıstaldar túrindegi aqshyl tústi zat. Saraptama qorytyndysyna sáıkes, bul zat jalpy salmaǵy 139,57 gram álfa-PVP esirtki zaty bolyp tabylady. Sonymen qatar kók tústi ızolentaǵa oralǵan, aqshyl untaqty zat, boljam boıynsha mefedron, bólek oralǵan 15 jáne 6 betbelgi tárkilendi. Páterden tabylǵannyń bári: suıyqtyq, krıstaldy jáne untaq kúıinde sot-hımıalyq saraptamaǵa jiberildi, – dedi Almaty qalalyq PD esirtki qylmysyna qarsy kúres basqarmasynyń bastyǵy Erlan Álmaǵambetov.
Aıtpaqshy, jas jigittiń buryn múliktik qylmys jasaǵany úshin sottylyǵy bar. Atalǵan derek boıynsha QR QK-niń 297-baby 2-bóligine sáıkes qylmystyq is qozǵaldy. İske qatysy bar azamat ýaqytsha ustaý ızolátoryna qamaldy. QR QK-niń 201-babyna sáıkes ózge aqparat tergeý múddesine oraı jarıa etilmeıdi. QR Konstıtýsıasynyń 77 baby 3-bólimi 1-tarmaǵy, QR QK-niń 19-baby 1-tarmaǵyna saı kez kelgen azamat sot sheshimi zańdy kúshine engenge deıin kinásiz dep sanalady.