Qazaqstannyń Syrtqy ister mınıstrligi Eýroparlamenttiń elimizdegi jaǵdaıǵa qatysty qabyldaǵan qarary birjaqty sıpatqa ıe ekenin jáne obektıvti emes tujyrymdarǵa negizdelgenin málimdedi, dep habarlaıdy Almaty-akshamy.kz
«Elimizde oryn alǵan qańtardaǵy qaıǵyly oqıǵalarǵa obektıvti baǵalaýdyń bolmaýy alańdaýshylyq týǵyzady.
Qazaqstan Respýblıkasynyń basshylyǵy tapsyrǵan resmı tergep-tekserý nátıjeleri jarıalanǵanǵa deıin mundaı qujattardy qabyldaý qısynsyz dep sanaımyz. Onyń nátıjeleri halyqaralyq qoǵamdastyqqa usynylatynyn taǵy da rastaımyz.
Qarar jobasyn ázirleý kezinde Eýropalyq Parlament depýtattary men onyń quramyndaǵy saıası toptar Qazaqstannyń resmı tulǵalarynan naqtylama aqparattar men túsindirýler suramaǵanyn atap ótemiz» delingen habarlamada.
Vedomstvo málimdemesine sensek, QR Adam quqyqtary jónindegi ýákili jáne memlekettik organdarmen tikeleı dıalog júrgizetin azamattyq qoǵam ınstıtýttary da atalǵan qujat avtorlarynyń olarǵa júginbegenin aıtqan.
QR Syrtqy ister mınıstrliginiń birqatar sheteldik buqaralyq aqparat quraldarynyń quqyq qorǵaý organdarynyń terorıstik, ekstremıstik jáne qylmystyq toptarǵa qarsy zańdy áreketterin sıpattaıtyn jarıalanymdarynda aıtarlyqtaı qaıshylyqtar men naqty emes tustar bar ekeni týraly buryn aıtylǵan ustanymy elenbegen.
«Qazaqstan BUU-nyń Adam quqyqtary jónindegi keńesiniń, bedeldi halyqaralyq uıymdardyń múshesi retinde, gýmanıtarlyq quqyq salasyndaǵy kópjaqty kelisimderdiń qatysýshysy bola otyryp, zańnyń ústemdigine jáne azamattardyń quqyqtary men bostandyqtaryn qorǵaý salasyndaǵy óz mindettemelerine tolyqtaı beıildi. Elimiz sondaı-aq halyqaralyq terorızmge qarsy kúresti qosa alǵanda, jahandyq jáne óńirlik qaýipsizdikti qamtamasyz etý úderisine qomaqty úles qosyp keledi.
Qazaqstan Respýblıkasy Eýropalyq odaqtyń barlyq ınstıtýttarymen ózara túsinistik jáne qurmet qaǵıdattary negizinde ózara syndarly is-qımyl jasaýǵa múddeli.
Eýropalyq Parlamenttiń atalǵan qararyn asyǵys qabyldaýy demokratıalyq ınstıtýttardy nyǵaıtý jáne azamattyq qoǵamnyń damýyna baǵyttalǵan QR Prezıdentiniń reformalaryn qabyldaý jáne júzege asyrý úderisine keri áser etedi jáne zıan keltiredi», - dedi SİM málimdemesinde.