«Sıfrlyq teńge» jobasynyń Konsýltatıvtik keńesi quryldy.
Ulttyq bank pen Tólem jáne qarjylyq tehnologıalardy damytý ortalyǵy «Sıfrlyq teńgeni engizý boıynsha sheshim qabyldaý modeli» baıandamasyn jarıalady, dep habarlaıdy Almaty-akshamy.kz .
Osy model boıynsha alynǵan zertteý nátıjeleriniń negizinde 2022 jyldyń sońyna deıin Qazaqstanda Ortalyq banktiń sıfrlyq valútasyn engizý týraly qorytyndy sheshim ázirlenedi.
«Sıfrlyq teńgeni iske qosý týraly sheshim qabyldaýdaǵy basymdyq tólem qyzmetterin tutynýshylar úshin aıqyn nátıje bolady. QUB pen TQTDO modeli halyqaralyq uıymdar (DEF, «Úlken jetilik» samıti, HVQ) usynǵan taldamalyq quraldardy, sondaı-aq sheteldik retteýshilerdiń tásilderin eskeredi. Modelde, sondaı-aq sıfrlyq teńgeniń tehnologıalyq iske asyrylýyn, áleýetti ekonomıkalyq paıdalar men shyǵyndardy, júıeni retteý múmkindikterin, sondaı-aq ekojúıeni damytý áleýetin baǵalaý boıynsha zertteýler qamtylǵan», - delingen Ulttyq banktiń baspasóz qyzmetiniń habarlamasynda.
Taldaý quraldary retinde tehnologıalyq eksperımentter, ekonomıkalyq modeldeý, múddeli taraptarmen dızaın-sessıalar qarastyrylǵan. 2022 jyldyń 4-toqsanynda naryqqa qatysýshylarmen jáne tutynýshylarmen Sıfrlyq teńgeniń tehnologıalyq platformasyn ótpeli testileý josparlanǵan.
Zertteý nátıjelerin obektıvti túsindirý maqsatynda táýelsiz halyqaralyq sarapshylar men halyqaralyq qarjy uıymdary qyzmetkerleriniń qatysýymen «Sıfrlyq teńge» jobasynyń Konsýltatıvtik keńesi quryldy. Qarjy naryǵynyń qatysýshylarymen sıfrlyq teńgeniń ekojúıesin qurý da jobany damytýdaǵy tabystylyqtyń mańyzdy faktory bolyp tabylady. Osy maqsattar úshin kollaboratıvti alań – Digital Tenge Hub quryldy, oǵan naryq qatysýshylary, ınfraqurylymdyq oıynshylar, halyqaralyq seriktester qatysady, - delingen habarlamada.
Sıfrlyq teńgeni engizý, onyń ishinde oflaın tóleý múmkindigi arqyly tólem men qarjylyq qyzmetterdiń qoljetimdiligin arttyrady.
Sıfrlyq teńge ınfraqurylymy qarjy naryǵyna qatysýshylar men memlekettik organdar úshin qosymsha quralǵa aınalady, bul smart-kontrakt tehnologıasy negizinde ınovasıalyq qyzmetterdi qurýǵa múmkindik beredi. Bolashaqta sıfrlyq teńgeni engizý transshekaralyq tólemderdiń tıimdiligin de eseleıdi.
«Sıfrlyq teńgeni engizý týraly sheshim qabyldaý modeli» baıandamasymen QUB saıtynyń «Sıfrlyq teńge: pılottyq joba» bóliminde, sondaı-aq, QUB tólem jáne qarjylyq tehnologıalardy damytý ortalyǵy payfintech.kz saıtynda tanysýǵa bolady.