Sotqa deıingi tergeý barysynda kúdikti jábirlenýshiniń telefonyn urlap, bank qosymshasyna zańsyz kirip, aqshany jymqyrǵany anyqtaldy.
Almatyda 23 jastaǵy jigit tanysynyń telefonyn urlap, shotynan aqshasyn aýdaryp alǵan, dep habarlaıdy Almaty-akshamy.kz Polisia.kz-ke silteme jasap.
«Ol gadjet pen aqshany tanysynan urlap ketken. Taǵy bir joly kúdikti ótip bara jatqan adamnan qońyraý shalý úshin telefonyn surap, mobıldi qosymshasyn ashyp, aqshasyn óz esepshotyna aýdaryp alǵan. Jedel izdestirý is-sharalary barysynda joǵaryda atalǵan urlyqtardy jasaǵan adam ustaldy. Ol 23 jastaǵy H. esimdi azamat bolyp shyqty. Qazirgi ýaqytta kúdiktiniń eki epızodqa qatysy bar ekeni dáleldendi. Osy derekter boıynsha QR QK-niń 188-baby 3-bóliginiń 2-tarmaǵyna sáıkes qylmystyq is qozǵaldy», – deıdi Áýezov aýdandyq polısıa basqarmasynyń bastyǵy Ulan Ábilqaıyr.
Ustalǵan azamat óz kinásin moıyndap, atalǵan qylmystarǵa óziniń qatysy baryn rastady. Oǵan «qamaý» túrindegi bultartpaý sharasy sanksıalandy.
«Al biz jas jigittiń qalada jasalǵan osyǵan uqsas basqa da qylmystarǵa qatysy bar-joǵyn tekserip jatyrmyz. İstiń tolyq jáne jan-jaqty tergeýin qamtamasyz etýge baǵyttalǵan birqatar tergeý áreketteri júrgizilýde, nátıjesinde qazirgi qylmystyq is sotqa joldanatyn bolady», – dedi Ulan Ábilqaıyr.