Memleket basshysy Qasym-Jomart Toqaevtyń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýyn jáne ózge de tapsyrmalaryn júzege asyrý aıasynda quqyq qorǵaý salasynda zamanaýı sıfrlyq tehnologıalardy keńinen engizý qolǵa alynýda. Bul – qylmystyń aldyn alý men azamattardyń qaýipsizdigin qamtamasyz etýdiń basty tetigi.
Qazirgi tańda elimiz boıynsha 19 myńnan astam beınebaqylaý kamerasy jasandy ıntellekt tehnologıalarymen jabdyqtalǵan. Olar adamnyń bet-álpetin tanýǵa, zattardy taldaýǵa jáne kólik aǵyndaryn baqylaýǵa qabiletti. Júıeler jedel basqarý ortalyqtarymen ıntegrasıalanǵandyqtan, oqıǵalarǵa naqty ýaqyt rejıminde jedel áreket etýge múmkindik beredi.
Polısıa qyzmetkerleri de jańa tehnıkalyq quraldarmen qamtylýda: zamanaýı planshetter, smart-jetondar men baılanys júıeleri tártip saqshylarynyń utqyrlyǵyn jáne jumysynyń tıimdiligin arttyrdy.
Azamattar úshin yńǵaıly «102» mobıldi qosymshasy, sondaı-aq eGovMobile jáne ekinshi deńgeıdegi bankterdiń qosymshasyna engizilgen «Zań jáne tártip» servısi arqyly kez kelgen quqyq buzýshylyq týraly bir batyrmany basý arqyly habarlaýǵa bolady. Bul qoǵam men quqyq qorǵaý organdary arasyndaǵy baılanysty nyǵaıtyp, senim deńgeıin arttyrady.
Sonymen birge, sıfrlyq sheshimderdiń kómegimen alaıaqtyqqa qarsy kúres kúsheıtildi. Máselen, alaıaqtardyń azamattardyń esep-shottarynan 2,2 mlrd teńge kólemindegi qarajatty urlaý áreketiniń joly kesildi. Qarjy naryǵyndaǵy quqyqtyq jáne sıfrlyq saýattylyqty arttyrýǵa baǵyttalǵan túsindirý jumystary da júıeli túrde júrgizilýde.
Erjan Sádenov atap ótkendeı:
«Sıfrlyq tehnologıalar tek qaýipsizdikti qamtamasyz etýde ǵana emes, halyqtyń quqyqtyq mádenıetin kóterýde de mańyzdy ról atqaryp otyr. Bul – Qazaqstandy quqyqtyq ári ádiletti memleket retinde nyǵaıtýdyń jańa qadamy».