Elordada QR İshki ister mınıstrligi men Sergek Group kompanıasynyń uıymdastyrýymen «Jol qaýipsizdigi salasyndaǵy sıfrlandyrý jáne jańa tehnologıalar» taqyrybynda forým ótti, – dep habarlaıdy Almaty-akshamy.kz.
Polisia.kz saıtynyń málimeti boıynsha forýmnyń ashylý saltanatynda mınıstrdiń orynbasary Igor Lepeha jol qaýipsizdigin qamtamasyz etý jáne ony tıimdi uıymdastyrý baǵytynda sıfrlyq tehnologıalardy qoldanýdyń mańyzdylyǵyna toqtaldy.
– Ózderińizge belgili, biz polısıa qyzmetkerlerine kólikterdi sebepsiz toqtatýǵa tıym saldyq. Qazirgi ýaqytta tek jol júrisi qaǵıdalary buzylǵan jaǵdaıda ǵana toqtatamyz. Sondyqtan da jol júrisi qaǵıdalaryn saqtaýdy baqylaýda sıfrlandyrýdyń mańyzy zor dep oılaımyn, – dedi Igor Lepeha.
Búginde İshki ister mınıstrligi jol qaýipsizdigin qamtamasyz etý, joldardaǵy ólim-jitim deńgeıin tómendetý maqsatynda zamanaýı sıfrlyq sheshimderdi, avtomatty stasıonarlyq jáne mobıldi kameralardy paıdalaný boıynsha aýqymdy jumystar júrgizip jatyr. Sonyń nátıjesinde jol-kólik oqıǵalary 11%-ǵa, jaraqat alǵandardyń sany 7%-ǵa, al qaza tapqan jaıaý júrginshilerdiń sany 24%-ǵa azaıyp otyr. Sondaı-aq kólik júrgizýshiler tarapynan jol júrisi qaǵıdalaryn óreskel buzý, qaýipti júrgizýshiler men jalǵan memlekettik tirkeý nómirlerin anyqtaý boıynsha engizilgen “Qorǵaý” júıesi de óz jemisin kórsetip jatyr.
– Mınıstrdiń tapsyrmasyna sáıkes biz «Qorǵaý» júıesin Shymkent qalasynda iske qostyq. Bul qosymsha stasıonarlyq kameralar arqyly qaýipti júrgizýshilerdi anyqtap, patrúldik polısıa qyzmetkeriniń qyzmettik planshetine jiberip otyrady. Osynyń negizinde jalǵan memlekettik nómirlerdi paıdalaný arqyly jaýapkershilikten jaltaryp júrgen júrgizýshilerdi de anyqtadyq, – dedi QR İİM ákimshilik polısıa komıteti tóraǵasynyń orynbasary Serik Túsipov.
Forýmǵa qatysýshylar ishki ister organdarynyń jumysyn jetildirý maqsatynda «Sıfrlyq polıseı» jobasyn, smartbeınejetondardyń tıimdilin, sondaı-aq jedel basqarý ortalyǵynyń jańa baǵdarlamasyn basqarý úshin sıfrlyq tehnologıalardy paıdalaný máselesin talqylady. Jıyn sońynda ishki ister mınıstriniń orynbasary Sáken Sársenov qylmystardyń jolyn kesý, anyqtaý jáne ashý kezindegi jedeldik sıfrlandyrýdyń artyqshylyǵy ekenin atap ótip, forýmǵa qatysýshylarǵa alǵysyn bildirdi.