Polısıa qyzmetkerleri men Ulttyq ulan áskerı qyzmetshileriniń úılesimdi is-qımyldarynyń arqasynda Tarazda habar-osharsyz ketken úsh bala aman-esen tabyldy, dep habarlaıdy almaty-akshamy.kz QR Ulttyq ulanynyń baspasóz qyzmetine silteme jasap.
3 shilde saǵat 3:30 shamasynda Ulttyq ulannyń 5513 áskerı bóliminiń kezekshisine polısıa departamentinen eki ul men bir qyz balanyń úıden shyǵyp, oralmaǵany týraly habarlama kelip tústi. 5 pen 9 jas aralyǵyndaǵy balalar tústen keıin úıden shyǵyp ketken. Olarǵa baskóz bolyp qalǵan 14 jasar aǵasy bul sátti baıqamaı qalǵan. Belgili bolǵandaı, balalardyń anasy olardy jalǵyz baǵyp-qaǵady. Biraq ol sol sátte aýrýhanada bolǵan. Úlken aǵasy olardy tústen keıin óz betinshe izdeı bastaǵan. Taba almaǵan soń polısıaǵa habar bergen.
İzdeý sharalaryna 500-ge jýyq polısıa qyzmetkerleri jáne Ulttyq ulannyń 100 áskerı qyzmetshisi qatysty. İzdeý toptarynyń biri "Qarataý" shaǵyn aýdanynda joǵalǵan balalardy baıqaǵan kýágerden aqparat aldy. Belgilengen jerde efreıtor Jandos İlıasov "Dak" esimdi qyzmettik ıtimen izdestirý jumystaryna atsalysty.
- "Dak" birden "Jánibek-Kereı" saıabaǵyna apardy. Saıabaqty tintý kezinde biz oryndyqtardyń birinde uıyqtap jatqan balalardy taptyq. Balalar úıden tys jerde oınap júrip, adasyp ketken. Sharshaǵan soń mańaıdaǵy oryndyqtardyń birinde uıyqtap qalǵan. Abyroı bolǵanda, aýa raıy da qolaıly boldy. Tabylǵan balalar otbasyna tabystaldy, - dedi izdeý sharalaryna qatysqan efreıtor J. İlıasov.
Balalardyń anasy, týystary men kórshileri barlyq polısıa qyzmetkerleri men Ulttyq ulan áskerı qyzmetshilerine sábılerdi izdeýde kórsetken kómegi úshin alǵys aıtty.