Kún tártibindegi eń ózekti máselelerdi talqylandy.
14 shilde kúni Tájikstan Respýblıkasynyń tóraǵalyǵymen ótken Shanhaı yntymaqtastyq uıymyna múshe memleketterdiń Syrtqy ister mınıstrleri keńesiniń (SHYU SİMK) kezekti otyrysy ótti, dep habarlaıdy Almaty-akshamy.kz.
Atalmysh sharaǵa Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi qatysty.
Otyrys aldynda SHYU elderiniń Syrtqy ister mınıstrlerin Tájikstan Respýblıkasynyń Prezıdenti Emomalı Rahmon qabyldady.
«SİMK barysynda SHYU elderiniń syrtqy saıası vedomstvolarynyń basshylary uıymnyń 20 jyl ishindegi qyzmetin qorytyndylap, halyqaralyq jáne óńirlik kún tártibindegi eń ózekti máselelerdi talqylady. SHYU qyzmetin odan ári damytýdyń birinshi kezektegi mindetteri jáne uıymnyń basqa da kópjaqty qurylymdarmen ózara is-qımyl jasaý máseleleri qaraldy»,– delingen Qazaqstannyń Syrtqy ister mınıstrliginiń baspasóz qyzmetiniń habarlamasynda.
Óz sózinde Mınıstr Muhtar Tileýberdi SHYU-nyń halyqaralyq qaýipsizdik pen óńirlik yntymaqtastyqty nyǵaıtýdaǵy róli men mańyzyn atap ótti.
«Uıymnyń basqa múshelerimen birge Qazaqstan uıymnyń zor áleýetin tolyqqandy iske asyrýǵa óziniń turaqty túrde laıyqty úlesin qosýǵa umtylýda», - dedi Qazaqstan SİM basshysy.
Úndistan, Qazaqstan, Qytaı, Qyrǵyzstan, Pákistan, Reseı, Tájikstan jáne Ózbekstan Syrtqy ister mınıstrleri 2021 jylǵy qyrkúıekte Dýshanbede ótetin SHYU-ǵa múshe memleketter basshylary Keńesiniń otyrysyna daıyndyq barysyn maquldap, sondaı-aq Dýshanbe deklarasıasy jáne mereıtoılyq samıttiń basqa da qorytyndy sheshimderiniń jobalaryn bekitti.
Otyrys qorytyndysy boıynsha SHYU syrtqy ister mınıstrleriniń aqparattyq habarlamasy qabyldandy.
Sol kúni Syrtqy ister mınıstrleri deńgeıinde «SHYU – Aýǵanstan» Baılanys tobynyń otyrysy ótti, onyń barysynda qatysýshylar AIR-daǵy aǵymdaǵy áskerı-saıası jaǵdaıdy jáne SHYU-nyń Aýǵanstanmen odan ári yntymaqtastyq máselelerin talqylady. SHYU Baılanys tobynyń Aýǵanstanmen kezdesý qorytyndysy boıynsha SHYU múshe memleketteri syrtqy ister mınıstrleriniń Birlesken málimdemesi qabyldandy.
İs-shara aıasynda Muhtar Tileýberdi Pákistan Syrtqy ister mınıstri Mahmýd Kýreshımen ekijaqty kelissózder júrgizdi. Taraptar ekijaqty yntymaqtastyq pen óńirlik yntymaqtastyqty nyǵaıtý máselelerin talqylady.
