Belarýs Respýblıkasynyń Shanhaı yntymaqtastyǵy uıymyna kirý prosesi aıaqtalýǵa jaqyn.
Bul týraly Memleket basshysy Qasym-Jomart Toqaev SHYU-ǵa múshe Memleketter basshylary keńesiniń otyrysynda aıtty, dep habarlaıdy Almaty-akshamy.kz QazAqparatqa silteme jasap.
«Eń aldymen, Shanhaı yntymaqtastyq uıymyna Úndistan Respýblıkasynyń tabysty tóraǵalyq etkeni úshin Premer-mınıstr Narendra Modı myrzaǵa alǵys aıtamyn. Sizdiń elińiz uıymymyzdy dáıekti damytýǵa jáne onyń halyqaralyq bedelin arttyrýǵa eleýli úles qosty. Búgingi samıt ashyqtyq, ózara senim men teń quqyqtyq prınsıpterine negizdelgen jahandyq kópjaqty dıalogqa tyń serpin beredi. SHYU qarqyndy túrde keńeıip keledi. Bul uıymnyń róli artyp kele jatqanyn jáne kópjaqty ózara tıimdi yntymaqtastyǵymyzdyń nyǵaıa túskenin bildiredi.
Osy rette áriptesimiz Iran Islam Respýblıkasynyń Prezıdenti Ibrahım Raısıdi SHYU-ǵa tolyqqandy múshe memleket mártebesin ıelenýimen quttyqtaýǵa ruqsat etińizder. Belarýs Respýblıkasynyń da bizdiń Uıymǵa múshe ataný prosesi aıaqtalýǵa jaqyn. Osy jaǵdaıdy paıdalana otyryp, áriptesimiz Prezıdent Aleksandr Grıgorevıch Lýkashenkony keshe ótken Belarýstiń Táýelsizdik kúnimen quttyqtaımyn. Baýyrlas belorýs halqyna amandyq, baq-bereke tileımin. Birneshe kúnnen keıin Ózbekstan Respýblıkasynda prezıdent saılaýy ótedi. Qurmetti Prezıdent Shavkat Mıromonovıch Mırzıóevke osy mańyzdy sharany tabysty ótkizýge tilektestik bildiremin», - dedi Q.Toqaev.
Prezıdent atap ótkendeı, Shanhaı yntymaqtastyq uıymynyń halyqaralyq bedeli joǵary.
«Búginde tabysty ári kópjaqty uıymǵa aınaldy. Jer shary halqynyń shamamen jartysyn qamtıtyn SHYU – kún tártibinde aýqymdy máselelerdi qarastyratyn biregeı eýrazıalyq uıym. Álemdik JİÓ-niń tórtten biri, dúnıejúzilik saýdanyń 15 paıyzy bizdiń memleketterimizdiń úlesine tıesili», - dedi Memleket basshysy.