İle Alataýy memlekettik tabıǵı ulttyq parkindegi shyrshalar kúni-túni kúzetiledi
Jańa jyl merekesi qarsańynda İle Alataýy memlekettik ulttyq tabıǵı parkinde aǵashtardy zańsyz kesýdiń aldyn alý maqsatynda kezekshilik jáne patrúldik keste ázirlendi, dep habarlaıdy almaty-akshamy.kz
Jańa jyl qarsańynda mereke sımvoly — shyrshany zańsyz otaıtyndardyń qatary kóbeıedi. İle Alataýy memlekettik ulttyq tabıǵı parkiniń ǵylymı zertteý jumystary jáne taýly agrobıoártúrlilik bólim basshysy Saltanat Óserbaevanyń aıtýynsha, jasyl jelekti qorǵaý maqsatynda İle Alataýy parkinde kezekshilik kestesi quryldy. Parktiń 14 baqylaý-ótkizý pýnktinde táýlik boıy kezekshilik turatyn boldy.
«Kóp adam Jańa jyldy isi ańqyǵan naǵyz orman shyrshasymen qarsy alǵandy unatady. Biraq ormanshylar qylqan japyraqty aǵashty kespeýge shaqyrady. Júzdegen jyl boıy ósetin shyrsha aǵashtaryn bir sátte otaýǵa bolmaıdy. Máńgi jasyl aǵashtardy urpaǵymyzǵa da qaldyrýymyz kerek», - deıdi ulttyq saıabaq qyzmetkeri.
Onyń aıtýynsha, quqyq buzýshylar QR Qylmystyq kodeksiniń 340-baby boıynsha jazalanady.
«Aǵashtar men butalardy zańsyz keskender 200 saǵat qoǵamdyq jumysqa tartylady nemese 200 AEK aıyppul tóleıdi. Elý táýlikke qamaýǵa alý sharasy da qoldanylady. Tipti múlki tárkilenip, úsh jylǵa deıingi merzimge laýazymdy qyzmet atqarý quqyǵynan aıyrylýy múmkin», - dep túsindirdi Saltanat Óserbaeva.
Aıta keteıik, jyl saıyn ulttyq park aýmaǵynda 0,2 gektar jerge Shrenk shyrshasynyń kóshetteri otyrǵyzylady.