Jańa jylda shyrsha ornatý dástúrin Reseıge Pótr I patsha ákelgen
Soltústik Eýropa halyqtary hrıstıan dini kelgenge deıin qysy-jazy jasyl bolyp turatyn shyrshalarmen úıdi sándep otyrǵan, dep habarlaıdy Almaty-akshamy.kz.
Dástúrge sáıkes, aǵashtyń rýhy bar dep sanalǵan, shyrsha butaqtaryn bezendirý olardy tynyshtandyrýdyń eń ońaı joly dep esepteldi. Mysaly, german halyqtary úshin qylqan japyraqty aǵashtar máńgilik ómirdi beıneleıdi, onyń ústine Kún osy aǵashqa nuryn erekshe tógedi dep sanaıdy. Sondyqtan qys ýaqytynda úıdiń ishin shyrshamen bezendirip otyrǵan. Al, shyrshanyń tóbesine juldyz qoıýdy XV ǵasyrda ómir súrgen Martın Lúter esimdi din adamymen baılanystyrady. Ol Betlehem juldyzyn eske alý úshin aǵashty juldyzshamen bezendirdgen.
Jańa jylda shyrsha ornatý dástúrin Reseıge Pótr I patsha ákelgen. Ol 1700 jyly jańa jyldy 1 qyrkúıekte emes, 1 qańtarda toılaý jóninde jarlyq shyǵarǵan. Onda úlken kóshe boıyna, mádenı jáne rýhanı oryndardyń aldyna shyrsha qoıý aıtylǵan. Degenmen, patsha kóz jumǵan soń Jańa jylda kóshelerdi shyrshamen bezendirý umyt qalady. Tek, 1818 jyly Nıkolaı I patshanyń otbasynda Jańa jyldy shyrshamen sándeý qaıta tanymal bola bastaıdy. Patshanyń áıeli Aleksandra Fódorovanyń shyǵý tegi nemis edi. XIX ǵasyrdyń aıaǵynda Jańa jyl qarsańynda shyrshany ádemi oıynshyqtarmen bezendirý Reseı ımperıasy aýmaǵynda qalypty jaǵdaıǵa aınaldy.