Almatyda jańa «Shyń» stýdenttik teatrynyń ashylý saltanaty ótti. Teatr Abaı atyndaǵy Qazaq ulttyq pedagogıkalyq ýnıversıtetiniń Óner, mádenıet jáne sport ınstıtýty janyndaǵy ónerge umtylǵan stýdent-jastardyń bastamasymen uıymdastyrylyp otyr.
Óner, mádenıet jáne sport ınstıtýtynyń tárbıe isi jónindegi dırektorynyń orynbasary Gúljazıra Ahmetova «Shyń» teatry stýdentterdiń bastamasymen qurylǵanyn aıtady.
– Byltyr bizde qoǵam arasyndaǵy áleýmettik máselelerdi kóterý maqsatynda festıvál uıymdastyryldy. Sol kezde stýdentter qoıylym qoıyp, ary qaraı ózderiniń yntasymen teatr ashýdy uıǵarǵan edi. Ótken kúzde elordamyz Astanada ótken festıválge baryp keldik. Endi ónerdiń shyńyna shyǵaıyq degen maqsatpen «Shyń» atanǵan stýdentter teatrynyń ashylýyna barynsha qoldaý tanytyp jatyrmyz, – dedi.
G.Ahmetova «Sábı bolǵym keledi» qoıylymy qoǵamdaǵy áleýmettik máselelerdi kóterýge baǵyttalyp, senarıin oqý ordasynyń byltyrǵy túlegi Juldyzaı Muhtardyń jazǵanyn aıtady.
-Jalpy, qoıylymdy somdaǵan jastardyń barlyǵy akterlik sheberlik kýrsynan dáris almasa da, yntalary óte joǵary. Dekorasıasyn, sahnalyq kıim úlgilerin stýdentterdiń ózderi daıyndady. Spektákldiń aıtar oıy anyq – jastar arasynda beleń alyp bara jatqan nashaqorlyq, jeńil júriske túsý syndy qoǵamǵa jat ózekti máselelerdi kóterip otyr, – dedi G.Ahmetova.
Al Abaı atyndaǵy Qazaq ulttyq pedagogıkalyq ýnıversıtetiniń Óner, mádenıet jáne sport ınstıtýtynyń 3-kýrs stýdenti, «Shyń» teatrynyń rejıseri Aıgerim Dáýlet teatrdyń osy bir ǵana qoıylymmen toqtap qalmaı, basqa da spektáklderdi qoıýdy josparlap otyrǵanyn aıtady.
-Bizdiń teatr, negizinen, áleýmettik taqyryptardy qozǵaıdy. Stýdentter qoǵamnyń ártúrli taqyryptaryn erkin aıta alatyn halyq qoı. Sol sebepti, ózimiz, stýdentter bolyp, qoǵamnyń basqa teatrlarda kórsetpeıtin tustaryn kórsetkimiz keldi. «Sábı bolǵym keledi» qoıylymy bir adamnyń ómiri arqyly ómirde kúndelikti oryn alatyn jemqorlyq, aldaý-arbaý syndy ótkir problemalardy kóteredi. Baspana turǵyzbas buryn onyń irgetasynyń myqtylyǵy qanshalyqty mańyzdy bolsa, sábı kezinen balaǵa jylylyq pen jaqsy tárbıeniń sonshalyqty mańyzdy ekenin jetkizgimiz keledi. Sonymen qatar, «Bir dáýren bozbalalyq» atty stýdentterimizdiń jazǵan spektakli bar. Sátin salsa, kelesi aptada sahnalasaq pa dep otyrmyz, – deıdi Aıgerim Dáýlet.