Maǵan bireý "tapsyrys" bergen sıaqty
Shymkenttiń burynǵy ákimine quqyq qorǵaý organdarynan eshqandaı habarlama kelmegen, dep habarlaıdy Almaty-akshamy.kz Orda.kz-ke silteme jasap.
«Shynymdy aıtsam, eshqandaı is týraly habarym joq. Eshkim eshqaıda shaqyrǵan joq, maǵan eskertpedi. Áleýmettik jelide jazylǵandar bos sóz. Buǵan meniń esh qatysym joq. Bul ne úshin jasalǵanyn bilmeımin. Ol adam (aryz jazǵan – avt.) – qarapaıym kásipker, Qazaqstanda ondaılar kóp. Men kóp kásipkerdi bilemin. Biraq ol adammen eshqandaı qatysym bolǵan emes. Onymen múldem baılanysta bolǵan joqpyn. Árıne, ómir boıy, dálirek aıtsaq, 22 jyl memlekettik qyzmette boldym. Men de basqalar sıaqty bul bıznesmenderdi memlekettik qyzmetker retinde ǵana bilýim múmkin», – dedi Ábdirahymov.
Sondaı-aq, ol aýyr qylmys jasady dep aıyptaý "óz aldyna qylmys ekenin" atap ótti.
«Nege adamdar mundaıǵa jol beredi. Bul aqparatty jarıalaǵan Kozachkov myrza maǵan habarlaspady. Keshe Bas prokýratýra da aqparatty teriske shyǵardy. Biraq olar áli tynyshtalmaı otyr. Maǵan bireý "tapsyrys" bergen sıaqty. Biraq munyń ne úshin jasalyp jatqanyn bilmeımin», – dep qosty eks-ákim.
Ábdirahymov qazir Nur-Sultanda turatynyn, kásipkerlikpen jáne jobalarmen aınalysyp jatqanyn aıtty.
Aıta ketý kerek, keshe polısıa Shymkenttiń eks-ákimi Ǵabıdolla Ábdirahymov pen QR UQK burynǵy tóraǵasy Kárim Másimovke qatysty qylmystyq istiń qozǵalǵanyn rastaǵan bolatyn. Habarlamada qylmystyq derek boıynsha is júrgizýdi Almaty qalasy PD tergeý basqarmasy júzege asyratyny aıtylǵan.