Áıel óz atynan ózge bireýdiń nesıe alǵanyn bilip, jedel túrde polısıaǵa júgingen
Shymkentte úı ıesi bala kútýshiniń ańǵaldyǵyn paıdalanyp, atynan nesıe rásimdegen, dep habarlaıdy Almaty-akshamy.kz Polisia.kz-ke silteme jasap.
Shymkenttegi Abaı aýdanynyń polısıa basqarmasyna Túrkistan oblysynyń 57 jastaǵy turǵyny aryzdanǵan. Onyń aıtýynsha, 2022 jyly shilde aıynda Shymkentte aýqatty turatyn otbasynda bala kútýshisi bolyp qyzmet etken. Sol kezde atalǵan januıanyń múshesi jasyryn túrde onyń telefonyn alyp, bank qosymshasy arqyly 1 mln teńge kóleminde zańsyz nesıe rásimdegen. Áıel óz atynan ózge bireýdiń nesıe alǵanyn bilip, jedel túrde polısıaǵa júgingen.
"Tártip saqshylary atalǵan jaıtty QR QK-niń 190-babymen (Alaıaqtyq) tirkep, jedel izdestirý sharalaryna kiristi. Krımınaldyq polısıa bóliminiń qyzmetkerleri júrgizgen jedel-izdestirý jumystary nátıjesinde kúdikti bir táýlik ishinde qala aýmaǵynda qolǵa tústi. Ol Shymkent qalasynyń 26 jastaǵy turǵyny bolyp shyqty. Kúdikti ýaqytsha jumyssyz", - delingen habarlamada.
Tergeý barysynda ustalǵan azamatsha bala kútýshiniń ańǵaldyǵyn paıdalanǵanyn moıyndap, zańsyz áreketke qaryzynan qutylý úshin barǵanyn jáne bul úshin ókinetinin aıtty. Qazirgi tańda sotqa deıingi tergeý áreketteri jalǵasyp jatyr.