Táýelsizdiktiń 30 jyldyǵy
Búgin Shymkentte «Bıznestiń jol kartasy» memlekettik baǵdarlama aıasynda medısına buıymdaryn shyǵaratyn jańa kásiporyn ashyldy, - dep habarlaıdy Almaty-akshamy.kz.
Jobanyń quny 500 mıllıon teńgeni quraıdy. Munda jańadan 50 jumys orny quryldy.
Kásiporyn jylyna ımmýnofermentti analızdiń 500 myń jınaǵyn jáne 70 mıllıon ınsýlındi ıne shyǵarýǵa qaýqarly.
«Tassaı» ındýstrıaldy aımaǵynda ornalasqan óndiris oshaǵynyń ashylý saltanatyna qala ákimi Murat Áıtenov qatysty.
QR Táýelsizdiginiń 30 jyldyq mereıtoıymen quttyqtaǵan qala basshysy osy jyldar ishinde qalanyń damýy jolyndaǵy eseli jetistikterdi atady.
«Táýelsizdik jyldarynda qalaǵa tartylǵan ınvestısıa kólemi 2,6 trıllıon teńgege jetti. Onyń teń jartysy sońǵy 3,5 jyldyń úlesine keledi. Otyz jylda shaǵyn jáne orta kásipkerlik sýbektiler sany 6 myńnan 74 myń birlikke, onda jumyspen qamtylǵandar sany 35 myńnan 168 myń adamǵa artty. Shymkent qalasy megapolıs bolyp qalyptasty. Shymkent – bir-birine qyzmet kórsetip, bir-birinen taýar alatyn úlken naryqqa aınaldy», - dedi Murat Áıtenov.
Megapolıste esepti kezeńde ónerkásip salasynda 500-den astam jańa jumys orny ashylyp, jańa 10 kásiporyn iske qosyldy. Al, "Bıznestiń jol kartasy-2025" memlekettik baǵdarlamasy sheńberinde 7,8 mıllıard teńgege 1 946 jobaǵa qoldaý kórsetilgen.