Aspaly joldyń jumysy toqtatyldy.
Almatynyń Shymbulaq týrısik aýmaǵynan joǵary tusta qar kóshkini júrip, bir adam mert boldy, dep habarlaıdy Almaty-akshamy.kz.
«Shymbulaq» taý-shańǵy kýrorty baspasóz qyzmetiniń málimetinshe, 10 naýryz kúni taýda shańǵy teýip júrgen demalýshy qar kóshkinin túsiretin quralmen soqtyǵysyp, kóshkin astynda qaldy.
«Tańǵy saǵat 10:58-de kýrorttyń qutqarýshylaryna Kombı-2 tireginiń 8-den joǵary aımaǵynda qar kóshkini bolǵany týraly aqparat tústi. Oqıǵa ornyna saǵat 11:02-de jetken qutqarýshylar er adamnyń denesin tapty. Belgili bolǵandaı, ol ruqsat etilgen aımaqtan shyǵyp ketken. Saǵat 11:25-te medısınalyq pýnktke jetkizildi, mamandar onyń qaıtys bolǵanyn anyqtady», - dep habarlady «Shymbulaq» taý shańǵy kýrortynyń baspasóz qyzmeti.
Kýrort ákimshiligi er adamnyń týystary men jaqyndaryna qaıǵylaryna ortaqtasyp, kóńil aıtty.
Qazirgi ýaqytta aspaly joldyń (Kombı-2) jumysy toqtatyldy. Túsken qar massasynyń kólemi anyqtalyp jatyr. Oqıǵa ornyna Almaty qalalyq TJD-nyń 1 mamany men 1 tehnıkasy, respýblıkalyq jedel-qutqarý jasaǵynyń bir tehnıkasy men 8 qyzmetkeri jumyldyryldy.