Almaty akademıasyna Qazaqstan-Nemis ýnıversıtetiniń rektory keldi
İİM Almaty akademıasyna Qazaqstan-Nemis ýnıversıtetiniń rektory, doktor Rommel Volrad keldi, dep habarlaıdy Almaty-akshamy.kz Polisia.kz-ke silteme jasap.
İİM Almaty akademıasynyń tyńdaýshylary Qazaqstan-Nemis ýnıversıtetiniń rektory profesor Dr.Rommel Volrad bastaǵan ýnıversıtet ókilderimen kezdesti.
Qonaqtardyń arasynda Almaty akademıasyna aty berilgen general Maqan Esbolatovtyń nemeresi Zarına Esbolatova da boldy. Sheteldik ýnıversıtet mamandary generaldyń eskertkishine gúl shoqtaryn qoıyp, akademıa murajaıyn aralady. Atalǵan ýnıversıtette qyzmet atqaratyn Zarına Esbolatova áriptesterin Qazaqstan polısıasynyń qalyptasýynan syr shertetin eksponattar jınaqtalǵan murajaıdaǵy M.Esbolatovqa arnalǵan buryshpen de tanystyrdy.
Qazaqstan-Nemis ýnıversıtetiniń rektory, doktor Rommel Volrad Almaty akademıasynyń tyńdaýshylaryna ózi basqaratyn ýnıversıtet týraly málimet berip, munda Ortalyq Azıanyń túkpir-túkpirinen kelgen stýdentter bilim alatynyn erekshe atap ótti. Qazaqstan-Nemis ýnıversıteti eki eldiń úkimetaralyq kelisimi aıasynda jumys isteıdi jáne 1999 jyly “Bilim berý salasyndaǵy Qazaqstan-Nemis yntymaqtastyǵy” qoǵamdyq qorynyń jeke bastamasymen qurylǵan. Ýnıversıtet bazasynda mamandar nemis standarty boıynsha daıarlanady. Bul atalǵan oqý ornyndaǵy oqytýdyń sapasy joǵary ekenin kórsetedi.
Sondaı-aq, doktor Rommel Volrad Qazaqstan-Nemis ýnıversıtetiniń QR İİM Almaty akademıasymen yntymaqtastyǵyn jolǵa qoıýǵa múddeli ekenin atap ótti.