Komýnaldyq qyzmetkerler Almatyda qar tazalaý jumystary qalaı júrip jatqanyn aıtty
Almatyda 15-16 jeltoqsan kúnderi qalyń qar jaýyp, qalanyń jaǵdaıyna eleýli áser etti. Jeltoqsan aıyndaǵy aılyq normanyń úshten bir bóligi bolatyn bul jaýyn-shashynnyń nátıjesinde Almaty kóshelerinde qar qalyńdyǵy 22 sm-ge jetti, al taý bókterlerinde, atap aıtqanda Kamensk ústirti men Shymbulaqta qardyń qalyńdyǵy 40 sm jáne 42 sm boldy. Mundaı qolaısyz aýa raıy jaǵdaıynda qaladaǵy komýnaldyq qyzmetter kóshelerdi qaýipsiz ári júrýge qolaıly kúıge keltirý úshin qar tazalaý jumystaryna belsendi kiristi.
Almatyda qardyń saldaryn joıý úshin táýlik boıy 600-den astam arnaıy tehnıka men 1080 jumysshy jumyldyrylǵan. Qar jaýa bastaǵan sátten bastap qala kóshelerinen 6 520 m³ qar shyǵaryldy.
«Taza Qazaqstan» baǵdarlamasy aıasynda jýrnalıserge qalanyń kólik kóp júretin kósheleriniń biri – Abylaı han dańǵylyndaǵy tańǵy qar tazalaý jumystary kórsetildi. Bul jumystarǵa sypyrýshy arnaıy tehnıkalar, kópfýnksıonaldy jol mashınalary, Pony 4, KamAZ kólikteri jáne jumysshylar atsalysty. Bul tehnıkalar kóshelerdi qar men muzdan jedel tazartyp, turǵyndar úshin qaýipsizdik pen jaılylyqty qamtamasyz etedi.
Komýnaldyq ınfraqurylymdy damytý basqarmasy basshysynyń orynbasary Janat Jaqypbektiń aıtýynsha, qardy shyǵarý úshin aldymen jol jıekterinde qar úıindilerin jınaý boıynsha daıyndyq jumystary júrgiziledi. Bul jumystar iri gabarıtti tehnıkanyń (avtogreıderler, júk tıegishter) kómegimen túngi ýaqytta júzege asady. Tańerteńgi ýaqytta jol boıynda qar úıindileriniń bolýy – jumys prosesiniń tehnologıalyq qajettiligi. Qar úıindileri kelesi jumys aýysymynda shyǵarylady. Keıin qardy tazartqannan keıin jıektastar mańyn muzdan tazartý, muzdy oıý jáne qar aralas túzilimderdi joıý jumystary qolǵa alynady.
Qalanyń negizgi kóshelerinen qar shyǵarý jumystary 17-18 jeltoqsanǵa qaraǵan túni aıaqtalady dep josparlanǵan, biraq qar kúreý jumystary qys mezgili aıaqtalǵanǵa deıin jalǵasady.
Qysta qar tazalaý jumystary Almatydaǵy jalpy aýmaǵy 25,1 mln m² bolatyn 2 300-den astam kóshe men uzyndyǵy 2 777 km joldy qamtıdy. Bul jumystardy 10 merdigerlik uıym atqarady, al aýmaqtyń 70%-yn «Almaty tazalyq» MKK kúshimen tazalanady. Qala komýnaldyq qyzmetteriniń qolynda 1 084 arnaıy tehnıka jáne 1 240 jumysshy bar, bul olarǵa aýa raıynyń ózgeristerine saı tez qımyldap, qardyń saldaryn tıimdi joıýǵa múmkindik beredi.
Qorytyndylaı kele, komýnaldyq qyzmetter qala turǵyndarynan qardy ýaqytyly shyǵarý jumystaryn uıymdastyrý úshin túngi ýaqytta kólik quraldaryn jol jıekterine qoımaýdy ótindi.