Obyr derti beti ońaılyqpen qaıta qoıatyn aýrý emes. Bul – úlkendi de, kishini de jalmap jatqan asa qaterli kesel. Degenmen, kez kelgen rak aýrýy erte satysynda, der shaǵynda anyqtalsa, em nátıjeli bolady.
Almatyda «Qyzyl qyrkúıek» aksıasy aıasynda Dúnıejúzilik súıek kemigi donorlarynyń jáne Dúnıejúzilik sozylmaly mıeloıdty leıkozben kúres kúnderine oraı is-sharalar uıymdastyryldy. Almaly aýdanynyń onkology Gúlnur Basharova men №30 qalalyq emhananyń onkology Aıgerim Baqasova atalǵan emhanada tirkeýde turǵan turǵyndarmen kezdesip, qannyń qaterli isigi týraly ne bilý kerektigimiz, qalaı saqtaný qajettigi jaıynda áńgimeledi. Sondaı-aq, emhana mamandaryna da keńester berildi.
"Súıek kemigindegi jasýshalar qalypty emes nemese jyldam óse bastaǵanda súıek kemiginiń qaterli isigi nemese qan ragy paıda bolady. Bul aýrý tez (aýrýdyń jedel túrinde) nemese baıaý (aýrýdyń sozylmaly túrinde) damıdy. Qannyń qaterli isigimen jastar da, qarttar da, tipti, balalar da aýrýy múmkin. Aýrýdyń paıda bolýynyń naqty sebebi joq, biraq sebep bolýy múmkin birneshe faktor bar. Olar: tukymqýalaýshylyq (eger ata-babalarynda qannyń qaterli isigi bolsa, tuqym arqyly berilýi múmkin); zıandy hımıalyq zattardyń áseri; joǵary dárejeli radıasıa; vıch -ınfeksıa; Daýn aýrýy; zıandy ádetter (jıi temeki tartý).
Basqa onkologıalyq aýrýlar sıaqty qannyń qaterli isigin bastapqy satysynda emdeý tıimdi. Biraq alǵashqy kezeńinde anyqtaý kóp jaǵdaıda múmkin bolmaıdy. Alǵashqy belgileri: tez sharshaǵyshtyq, álsizdik, temperatýranyń kóterilýi, tersheńdik, ımýnıtettiń tómendeýi, bastyń aýrýy, tábettiń tómendeýi, jıi ınfeksıalyq aýrýlarmen aýrýy múmkin. Eger qandaıda bir osy aıtylǵan belgiler uzaq ýaqyt mazalasa, mekenjaı boıynsha tirkelgen emhanaǵa baryp tekserýden ótken durys. Bul bizge aýrýdy erte anyqtap, ýaqytyly emdeýge múmkindik beredi", – deıdi onkolog-dáriger Gúlnur Basharova.