Ábsattar Derbisáli – respýblıkamyzdaǵy arabtaný ǵylymynyń negizin salýshylardyń biri. Arabısıka salasy boıynsha elimizdiń tuńǵysh ǵylym doktory, tuńǵysh profesory, tuńǵysh akademıgi edi.
Bul týraly búgin Aqparat jáne qoǵamdyq damý mınıstri Aıda Balaeva óziniń áleýmettik jelidegi paraqshasynda jazdy, dep habarlaıdy Almaty-akshamy.kz
«Belgili dintanýshy, shyǵystanýshy, ıslamtanýshy ǵalym, Ábsattar qajy Derbisáliniń ómirden ozýyna baılanysty marqumnyń otbasy men jaqyn-týǵandarynyń qaıǵylaryna ortaqtasyp kóńil aıtamyn.
Bul - búkil qazaq rýhanıatyna ortaq aýyr qaıǵy. Ábsattar Baǵysbaıuly búkil sanaly ǵumyryn ımandylyqqa arnap, asyl dinimizdiń týra jolyn halyqqa durys jetkizý isine ólsheýsiz eńbek sińirdi.
Elimizdiń Bas múftıi laýazymynda júrgen ýaqytta qajy aǵamyzben qyzmet barysynda jolyǵysyp turdyq. Qaı kezde de óziniń keń minezimen, tereń bilimimen, parasatty bolmysymen rýhanıat bıiginen kórinip, elimizdegi ultaralyq kelisim men dinaralyq tatýlyqtyń órken jaıýyna ólsheýsiz úles qosqan jan edi.
Ábsattar qajy aǵamyzdyń zıaly bolmysy, eline sińirgen eńbegi, jazǵan rýhanı shyǵarmalary, jamaǵatty ıman jolyna shaqyrýda aıtqan aqyl sózderi – eshqashan tozbas rýhanı qazyna bolyp halqynyń jadynda máńgilik saqtalady.
Marqumnyń jatqan jeri jaryq, topyraǵy torqa bolyp, nury peıishte shalqysyn», dep jazdy mınıstr FB paraqshasyna.
Ábsattar Baǵysbaıuly 1947 jyly 15 qyrkúıekte qazirgi Túrkistan oblysy Túlkibas aýdanynda týǵan.
1969 jyly M.Áýezov atyndaǵy Ońtústik Qazaqstan memlekettik ýnıversıtetiniń fılologıa fakúltetin úzdik bitirgen.
1970-1975 jyldary - KSRO Ǵylym akademıasy Máskeý Shyǵystaný ınstıtýtynda aspırant.
1975-1976 jyldary Marokko Koróldigi, 1985-1986 jyldary Týnıs Arab Respýblıkasy ýnıversıtetterinde arab tili men ádebıeti boıynsha biliktilik arttyrýdan ótti.
1976-1977 jyldary - QR ǴA-nyń M.O. Áýezov atyndaǵy Ádebıet jáne óner ınstıtýtynyń ǵylymı qyzmetkeri.
1977 jyly - ál-Farabı atyndaǵy Qazaq ulttyq ýnıversıtetinde asıstent, aǵa oqytýshy, dosent, fılologıa fakúlteti dekanynyń orynbasary, Shyǵys fılologıa kafedrasynyń meńgerýshisi.
1986-1988 jyldary - KSRO ǴA Máskeý Shyǵystaný ınstıtýtynyń doktoranty.
1989 jyly - Shyǵystaný fakúltetiniń dekany, 1991-1997 jyldary - tilder jáne halyqaralyq baılanystar jónindegi prorektor.
1997-2000 jyldary - Qazaqstan Respýblıkasynyń Saýd Arabıasy Koróldigindegi elshiliginiń keńesshisi, 1-synypty keńesshi dıplomatıalyq laýazym ıesi.
2000 jáne 2005 jyldary - Qazaqstan musylmandarynyń İİİ jáne İV Quryltaılarynda Qazaqstan musylmandary dinı basqarmasynyń tóraǵasy, Bas múftı, 2007 jyldary Ortalyq Azıa múftıler keńesinde biraýyzdan osy keńestiń tóraǵasy,
2000 jyly tamyzda Bosnıa men Gersegovınanyń astanasy Saraevoda jáne 2002 jyly sáýirde Kıprde ótken Eýrazıa Islam Shýrasynyń IV-V halyqaralyq konferensıalarynda osy uıym tóraǵasynyń birinshi orynbasary bolyp eki ret saılandy.
Ábsattar Derbisáli – respýblıkamyzdaǵy jas arabtaný ǵylymynyń negizin salýshylardyń biri. Arabısıka salasy boıynsha elimizdiń tuńǵysh ǵylym doktory, tuńǵysh profesory, tuńǵysh akademıgi. Qoja Ahmet Iasaýı kesenesi men ondaǵy qulyptastardaǵy jazýlardy ana tilimizge aýdaryp, zerttedi.
2003 jáne 2006 jyldary qyrkúıekte Astanada álemdik jáne dástúrli ulttyq din lıderleriniń sıezerin ótkizýge úles qosty.
Ábsattar qajy Derbisáli Qazaqstanda arab tili men ádebıeti ǵylymyn qalyptastyrǵany jáne ıslam tarıhy men mádenıeti, dinine baılanysty kóptegen súbeli eńbekteri úshin 2002 jyly Egıpet Arab respýblıkasynyń 1-dárejeli «Ǵylym jáne óner» ordenimen, Qazaqstan ǵylymy men bilimi, ádebıeti men mádenıetine qosqan qomaqty úlesi úshin 2004 jyly «Parasat» ordenimen jáne 2001 jyly «Qazaqstan Respýblıkasynyń Táýelsizdigine 10 jyl», 2005 jyly «Qazaqstan Respýblıkasynyń Konstıtýsıasyna 10 jyl», 2008 jyly «Astanaǵa 10 jyl» merekelik medaldarymen jáne 2007 jyly QR Bilim jáne Ǵylym mınıstriniń «Qazaqstan Respýblıkasynyń ǵylymyn damytýǵa qosqan úlesi úshin» tósbelgisimen marapattaldy. 2005 jyldyń qarashasynda Ońtústik Qazaqstan oblysy, Túlkibas aýdany maslıhynyń sheshimimen «Túlkibas aýdanynyń qurmetti azamaty» jáne sol jyly Ońtústik Qazaqstan oblysy máslıhatynyń sheshimimen «Ońtústik Qazaqstan oblysynyń qurmetti azamaty» ataqtary berildi.