Qazaqstandyq-ındonezıalyq bıznes-forým
Indonezıanyń Sýrabaıa qalasynda Qazaqstannyń Qurmetti konsýldyǵy saltanatty jaǵdaıda ashyldy, sodan keıin qazaqstandyq-ındonezıalyq bıznes-forým ótti, dep habarlaıdy Almaty-akshamy.kz Syrtqy ister mınıstrliginiń resmı saıtyna silteme jasap.
Qazaqstannyń Qurmetti konsýly bolyp Sýrabaıa qalasynyń Saýda-ónerkásip palatasy tóraǵasynyń orynbasary, aqparattyq tehnologıalar, tamaq ónerkásibi, aýyl sharýashylyǵy salalaryndaǵy birqatar kompanıalardyń basshysy Abdýl Ǵofýr taǵaıyndaldy.
Qazaqstan Elshisi Danıar Sarekenov Shyǵys Iavada konsýldyq ashýǵa túrtki bolǵan alǵysharttar qatarynda Indonezıanyń jalpy ishki ónimniń 15%-yn quraıtyn ólkeniń joǵary ekonomıkalyq belsendiligin, Shyǵys Iava kásipkerleriniń qazaqstandyq áriptestermen ózara is-qımyl jasaýǵa qyzyǵýshylyqtaryn, sondaı-aq ınvestısıalyq, mádenı-gýmanıtarlyq salalarda yntymaqtasý perspektıvalaryn atap ótti. Qurmetti konsýldyq qazaqstandyq jáne shyǵys ıavalyq iskerlik toptardy baılanystyratyn býynǵa aınalady dep kútilýde.
Shyǵys Iava ólkesiniń Saýda-ónerkásip palatasynyń tóraǵasy Adık Pýtranto Indonezıanyń Saýda-ónerkásip palatasy basshylarynyń birin Qazaqstannyń qurmetti konsýly etip taǵaıyndaý qazaqstandyq kásipkerlermen praktıkalyq ózara is-qımyldy ilgeriletýde úlken mańyzǵa ıe ekenin atap ótti. Ol Qurmetti konsýldyqtyń ashylýy saýda aınalymyn arttyrýǵa, ınvestısıalar men týrızm salasyndaǵy yntymaqtastyqty nyǵaıtýǵa qosymsha serpin beretinine senim bildirdi.
Sýrabaıa qalasynyń Saýda-ónerkásip palatasynyń tóraǵasy Alı Affandı men Almaty qalasynyń kásipkerler palatasy tóraǵasynyń orynbasary Aqerkin Eralıeva qatysqan bıznes-forým sheńberinde eki qalada bıznes júrgizýdiń perspektıvti baǵyttary týraly tanystyrylymdar jasaldy.
40 mıllıonnan astam halqy bar Shyǵys Iava ólkesinde Indonezıanyń negizgi ónerkásiptik klasteri, sonyń ishinde toqyma, aıaqkıim, jıhaz, hımıa, metalýrgıa, farmasevtıka óndiristeri shoǵyrlanǵan. Sýrabaıa – iriligi jaǵynan Djakartadan keıingi ekinshi qala, ekonomıkalyq ortalyq jáne eldiń porty.