Sý tasqynynan zardap shekken 2300 otbasyna 555 mln teńgeden astam somaǵa áleýmettik kómek kórsetilgeni týraly QR Eńbek jáne halyqty áleýmettik qorǵaý mınıstrliginiń resmı ókili Madıar Ýakpaev málim etti, dep habarlaıdy almaty-akshamy.kz.
«Eńbek jáne halyqty áleýmettik qorǵaý mınıstrligi sý tasqynynan zardap shekkenderge keshendi qoldaý is-sharalaryn atqaryp jatyr. Atap aıtqanda, tótenshe jaǵdaı rejımi jarıalanǵan qalalar men aýdandarda turatyn 5 myń otbasyna ataýly áleýmettik kómek memlekettik organdarǵa júginýdi boldyrmastan avtomatty túrde Bekitildi. Sondaı-aq, balalardy qosa alǵanda, 4 myńǵa jýyq adamǵa múgedektikti qaıta kýálandyrý merzimderi avtomatty túrde uzartyldy. Múgedektigi boıynsha járdemaqy tóleý buryn belgilengen top boıynsha júzege asyrylady», - dedi M. Ýakpaev Ortalyq komýnıkasıalar qyzmetindegi baspasóz máslıhatynda.
Onyń aıtýynsha, sáýir aıyndaǵy zeınetaqy men járdemaqylar naqty adamdardyń ekinshi deńgeıdegi bankterdegi shottaryna jáne «Qazposhtaǵa» kidirissiz jáne tolyq kólemde aýdaryldy.
Sonymen qatar, jergilikti atqarýshy organdar óz qarajaty esebinen sý tasqynynan zardap shekken 2300 otbasyna 555 mln teńgeden astam somaǵaáleýmettik kómek jasady.
«Sý basqan aımaqtardan 96 múgedektigi bar adam evakýasıalandy. Jergilikti jerlerde olarǵa barlyq qajet kómek kórsetildi. Respýblıka boıynsha qarttar men múgedektigi bar azamattarǵa arnaýly áleýmettik qyzmet kórsetetin barlyq 118 ortalyq shtattyq rejımde jumys istep jatyr. Kásipodaqtar federasıasy áleýmettik osal sanattarǵa jatatyn azamattardy saýyqtyrý úshin respýblıkanyń 7 shıpadaıynda 164 oryn bóldi. Elektrondy úkimettiń mobıldi qosymshasynda sý tasqyny saldarynan keltirilgen zalaldy óteýge ótinish berý fýnksıonaly iske asyryldy. Qosymshany aprobasıalaý Aqmola oblysynda bastalady», - dedi resmı ókil.