Jańa oqý jylyn keı shved mektepteri elektrondy qurylǵysyz ótkizbek.
Endi olar sabaq barysynda kompúter, planshet paıdalanbaıdy. Ustazdar qaýymy jańa tehnologıa oqýshylardyń damý úrdisine keri áser tıgizedi deıdi. Stokgolmdaǵy bul shved mektebinde jańa oqý jyly ádettegiden ózgeshe bastaldy. Oqýshylar endi sabaq barysynda planshet paıdalanbaı, qalam ustap qaǵazǵa jazý-syzýdy daǵdyǵa aınaldyrmaq, dep habarlaıdy Almaty-akshamy.kz 24.kz-ke silteme jasap.
«Kompútermen jazý arqyly qoljazbanyń ne ekenin umytamyz. Al qolmen jazsań ádemi ári taza jazýdy úırenesiń. Maǵan oıymdaǵyny planshetke emes, dápterge túsirý áldeqaıda tıimdi», - deıdi 3 kýrs stýdenti Henrık Troll Adams.
Úkimet bilim berý júıesiniń sandyq tehnologıaǵa kóshýin quptap otyr. Óıtkeni bul álemde bar tájirıbe. Mektepterde ár balaǵa jeke planshet te bekitilgen.
«Men matematıka páninde planshetti qoldanamyn, onda biz ár túrli baǵdarlamalardy júzege asyramyz. Biraq mátin jazý úshin paıdalanbaımyn. 10 jasqa tolǵansha oqýshylar da tehnologıaǵa úırenispeýi kerek, óıtkeni bul ýaqytta olardyń jeke qoljazbasy qalyptasady. Osyny daǵdyǵa aınaldyrsa, qolmen jazýǵa mashyqtanady. Al qol men mıdy qatar qozǵaý aqparatty jyldam qabyldaýǵa múmkindik beredi», - deıdi muǵalim Katarına Branelıýs.
Bilim berý júıesin tolyq tehnologıaǵa kóshirýge IýNESKO uıymy túbegeıli qarsy. Mektep basshylyǵy da dástúrli ádisterden birden bas tartýǵa qarsy.
«Úkimet te, mektep te balalarmen tájirıbe jasamaýy kerek. Qandaı nátıje beretinin bilmeı, biz ózimiz tolyq meńgermegen dúnıelerdi oqýshylarǵa úırete almaımyz. Jańashyldyq múmkin 1 apta, 1 aıdan soń júıege jaqsy nátıje ákelýi múmkin, biraq aldaǵy eki jylda qalaı bolary belgisiz», - deıdi mektep dırektory Karolın Kerıng.
Sarapshylardyń pikirinshe, salada olqylyq oryn almas úshin tehnologıaǵa emes, bilimge kóbirek kóńil bólý kerek.
«Men oqý baǵdarlamasyna óte syn kózben qaraımyn. Sala úlken jaýapkershilikti júkteıdi, oqýshy-stýdentterge tájirıbe jasaýdy emes, kómektesip, qoldan kelgenin úıretýdi maqsat etedi. Aldymen, oqý baǵdarlamasynda bilimge basa nazar aýdarý kerek. Al is júzinde tehnologıany kóbirek qoldanylatyny belgili boldy. Kitap betin ashyp, oqý, jazý artta qalyp barady», - dep habarlaıdy bilim berý júıesiniń sarapshysy Inger Enkvıst.
Olqylyqty joıý úshin Iýrgardskollan mektebi oqýshylarǵa sabaqtan tys ýaqytta tehnologıany paıdalanýǵa tyıym saldy. Endi olar qońyraý kezinde planshetke úńilmeı, mekteptegi oıyn alańynda tıimdi ýaqyt ótkizbek.