Almatydaǵy eki jańa metro beket osylaı atalýy múmkin
Almatyda ashylatyn eki jańa metro beket «Shuǵyla» jáne «Tóle bı» dep atalýy múmkin. Muny qalalyq máslıhattyń VI sesıasynda tilderdi damytý jáne onomastıka bóliminiń basshysy Baqyt Qalymbet málimdedi. Aıtýynsha, metro beketiniń qurylysynyń jobasyna tehnıkalyq-ekonomıkalyq ázirleý úshin jańa beketterge ataý berý qajettiligi týyndap otyr.
«Naýryzbaı aýdanyndaǵy Shuǵyla sh/a. Alataý dańǵylynyń boıyndaǵy №1 beket onomastıkalyq tájirıbege súıene otyryp, jolaýshylardyń baǵdar alýyna yńǵaıly bolý úshin «Shuǵyla» dep ataý usynylyp otyr. Al Alataý dańǵylymen uzartylatyn Tóle bı kóshesiniń qıylysynda bolatyn №2 beketke «Tóle bı» ataýyn berý usynylyp otyr», - dedi ol.
Qalymbettiń ýájinshe, bul usynysty Almaty qalasy onomastıka komısıasy quptaǵan. Qala basshylyǵy tarapynan da qoldaý tapqan. Endi bul usynys Almaty ákimdigi men máslıhatynyń birlesken sheshimimen QR Úkimetiniń janyndaǵy respýblıkalyq onomastıka komısıasyna joldanady. Ol komısıa kelisim berse, Almaty ákimdiginiń qaýlysymen sheshim qabyldanady.