Jumys izdegen azamattardyń erikti kóshi-qonyna járdemdesý de ortalyqtyń mindetine kiredi.
Áleýmettik kodeksti iske asyrý aıasynda 1 shildeden bastap elimizdiń oblys ortalyqtary men megapolısterinde 20 eńbek mobıldiligi ortalyǵy qurylady, dep habarlaıdy Almaty-akshamy.kz
Al jumys istep turǵan halyqty jumyspen qamtý ortalyqtary mansap ortalyqtary bolyp qaıta qurylatyn bolady, dep habarlady Halyq Uni tilshisi.
Eńbek mobıldiligi ortalyqtarynyń negizgi jańa fýnksıalary:
- jumys kúshine suranys pen usynysty taldaý, boljaý negizinde óńirdiń eńbek resýrstarynyń teńgerimin qamtamasyz etý;
- óńirlik jumyspen qamtý kartalaryn ázirleý jáne olardy jergilikti jerlerde iske asyrýdy úılestirý;
- jumyspen qamtýdyń belsendi sharalaryn iske asyrý jáne óńirde iske asyrylatyn barlyq memlekettik baǵdarlamalar men jeke bastamalar sheńberinde ashylatyn jumys oryndarynyń qurylýyna monıtorıń júrgizý;
- jumyspen qamtýdy qamtamasyz etý maqsatynda azamattardyń erikti kóshi-qonyna járdemdesý jáne azamattardy kóshirý baǵdarlamalaryn óńirlik deńgeıde úılestirý;
- jumys izdeýshi retinde júgingen jáne jumyssyz adamdardy tirkeý;
- halyqty, jergilikti atqarýshy organdardy jáne ýákiletti memlekettik organdy óńirlik eńbek naryǵynyń jaı-kúıi týraly habardar etý.
«Jańa ortalyqtar osy fýnksıalardy iske asyrý úshin óńir aýmaǵynda jumys isteıtin eńbek naryǵynyń barlyq ınstıtýttaryn belsendi túrde tartatyn bolady. Ol úshin olarǵa azamattardyń nysanaly toptaryn jumysqa ornalastyrýmen baılanysty jekelegen fýnksıalardy aýtsorsıngke berý quqyǵy beriledi. Óz kezeginde mansap ortalyqtary qalalar men aýdandardaǵy eńbek mobıldiligi ortalyqtarynyń fılıaldary bolady. Jańa ortalyqtardyń negizgi mindeti ulttyq eńbek naryǵynyń kórsetkishterimen ushtastyra otyryp, jergilikti erekshelikterdi eskerip, óńirlik jumyspen qamtý saıasatyn iske asyrý», – dedi Eńbek jáne halyqty áleýmettik qorǵaý mınıstrliginiń Halyqty jumyspen qamtý departamentiniń dırektory Asqar Nıazov.
Bul rette qazir jumyspen qamtýǵa járdemdesý, erikti túrde qonys aýdarý, ataýly áleýmettik kómek taǵaıyndaý boıynsha is maketterin qalyptastyrý boıynsha kórsetiletin qyzmetterdiń barlyq spektri saqtalady jáne olardy kórsetý sol mekenjaılar boıynsha ornalasatyn mansap ortalyqtarynda jalǵasa beredi.
Bul transformasıa jumyspen qamtý qyzmetin júıeli túrde qaıta qurýǵa, jumysty jaqsartýǵa jáne memleket kórsetetin eńbek deldaldyǵy boıynsha qyzmetterdiń sapasyn arttyrýǵa baǵyttalǵan.
«Qyzmet kórsetý júıesin odan ári damytý maqsattarynyń biri – jumyspen qamtý salasyndaǵy barlyq qyzmetter men qoldaý sharalaryn tolyq sıfrlandyrý. Sıfrlyq jumyspen qamtý ortalyqtary – bul jumyspen qamtý organdary men olardyń klıentteri, ıaǵnı izdenýshiler men jumys berýshiler arasyndaǵy qarym-qatynastardy jáne bıznes-prosesterin túbegeıli ózgertip, olardy onlaın-formatqa aýystyrýǵa múmkindik beredi», – dedi Asqar Nıazov.
Onlaın qyzmetterdi iske qosý halyqtyń jumyspen qamtý organdary qyzmetkerlerimen tikeleı baılanysyn azaıtýǵa jáne azamattar úshin qyzmetterdiń qoljetimdiligin arttyrýǵa múmkindik berdi. Búginde jumyspen qamtý salasynda qyzmet alýǵa ótinish bildirgen azamattardyń shamamen 77%-y Elektrondyq eńbek bırjasy arqyly onlaın-formatty paıdalanady.
EHÁQM mamandary osy jylǵy 12-14 maýsym aralyǵynda elimiz boıynsha halyqty jumyspen qamtý ortalyqtarynyń qyzmetkerleri úshin oqytý semınarlaryn ótkizip, jumyspen qamtý organdaryn transformasıalaý maqsattary men eńbek mobıldiligi ortalyqtaryn qurý qajettiligi týraly túsindirme berdi.