Sheteldik JOO tańdaıtyndardyń aıtýynsha, bilim sapasynda aıyrmashylyq joq.
Shetelde bilim alyp jatqan stýdentterdiń oqýyn aıaqtamaı-aq elge qaıtýy kóbeıgen. Ulttyq statısıka búrosynyń dereginshe, byltyrdyń ózi Qazaqstanǵa qaıtqandardyń sany 13 myńnan asqan, dep habarlaıdy Almaty-akshamy.kz Almaty.tv-ge silteme jasap.
Rýstam Rahymov 17 jasynda Almatydan aǵylshyn eline ketken. Londondaǵy mektepterdiń birin bitirgen ol joǵary bilimdi de Eýropada alamyn dep sheshipti. Pandemıa dep elge oralǵan soń, oqýǵa qaıta barmaǵan.
«Eýropada 3 jyl turyp, Qazaqstannan artyq eldiń joǵyn túsindim. Bolashaǵymdy da osy jermen baılanystyramyn. Sózimniń bári ótirik sıaqty kórinýi múmkin. Biraq óz elimizdegi birneshe salany damytýǵa úles qosqym keledi», – dedi stýdent Rýstam Rahymov
Túlekterdiń aldynda túrli tańdaý turǵan soń, arman qýyp, muhıt asyp ketetinder bar. Sheteldik JOO tańdaıtyndardyń aıtýynsha, bilim sapasynda aıyrmashylyq joq.
«2018 jyldyń qyrkúıeginde Chehıaǵa oqýǵa tústim. Alǵashynda bilinbegenimen, 2-3 aıdan soń úıdi saǵyndym. Bilim salasynda aıtarlyqtaı ózgeris baıqamadym. Elim, jerim ǵoı. Alysqa ketip, álemdi aralaǵanym bolmasa, týǵan jerim ystyq ekenin túsindim», – dedi qala turǵyny Marıa Nasrıadjıeva.
«Shetelde oqyp, biraz aqsha qurtyp, sońynda stýdentterdiń kóbi oqýdy aıaqtamaı, elge kelip jatady. Árıne, ekonomıkalyq turǵyda aıyrmashylyq kóp, qymbatshylyq bar. Sondyqtan, Qazaqstanda oqyp-aq eńbekke aralasýdyń múmkindigi bar ekenin eskerý kerek», – dedi Týrızm jáne qonaqjaılylyq kafedrasynyń oqytýshysy Marıa Veretennıkova.
Tek oqý úshin emes, ózge memleketke jumys babymen ketetinder de bar. Máselen, marketıń boıynsha elde bilim alyp, joǵary oqý ornyn támamdaǵan Fatıma Tarǵambaı byltyr jazda amerıkalyq korporasıaǵa jumysqa turǵan. Dúkende 3 aı menedjer qyzmetin atqarǵan. Árıne, tájirıbe jınap, til úırengeni ras. Biraq o bastan elge qaıtýdy qalaǵan.
«Amerıkadan jaqsy estelik qaldy. Tájirıbe jınadym. Shynymen, ómirdi kórdim. Biraq bóten jerge tez úırene almadym. Júıe basqa, talap, kózqaras bólek. Osynyń bári meniń Qazaqstanǵa qaıtýyma sebep boldy», – dedi qala turǵyny Fatıma Tarǵambaı.
Elge oralǵan otandastardyń aıtýynsh, mentalıtet, til men ómir súrý qalpy ózgeshe ortaǵa sińip ketý de qıyn.