Elimizdegi metal qaldyqtarynyń basym bóligi otandyq kásiporyndarda óńdeledi.
Bul týraly QR Indýstrıa jáne ınfraqurylymdyq damý mınıstrligi Indýstrıalyq damý komıteti tóraǵasynyń orynbasary Turar Jolmaǵambetov málim etti, dep habarlaıdy Almaty-akshamy.kz QazAqparatqa silteme jasap.
Ortalyq komýnıkasıalar qyzmetindegi baspasóz máslıhatynda tilshiler sońǵy 30 jylda elimizde qansha tonna qara jáne tústi metal synyǵy men qaldyqtary shetelge tasymaldanǵany týraly surady. Óz kezeginde Turar Jolmaǵambetov jalpy atalǵan merzim boıynsha naqty málimetterdi aıta almaıtynyn jetkizdi.
«Mende dál qazir naqty sońǵy 30 jyl boıynsha kórsetkishter joq. Qatelespesem, 2000-shy jyldardaǵy esep boıynsha jylyna 3 mln tonnaǵa jýyq qara metal synyǵy elden shyǵarylatyn. Ol jyldary bizde eń basty tutynýshy «ArselorMıttal Temirtaý» AQ bolatyn. 2008 jyldan beri biraz kásiporyn paıda bolyp, metal synyqtary men qaldyqtary ishki naryqta qaıta óńdele bastaldy. Sońǵy jyldary bizde 1 mln tonnaǵa jýyq metal qaldyqtary shyǵaryldy. Al qalǵan 1,5-1,8 mln tonnasy elimizde óńdelip jatyr», - dedi vedomstvo ókili.
Budan buryn habarlanǵandaı, el aýmaǵynan qara jáne tústi metaldardyń synyqtary men qaldyqtaryn shyǵarýǵa ýaqytsha tyıym salyndy. Turar Jolmaǵambetov Reseıden daıyn metal ónimderi qymbat baǵaǵa ımporttalyp jatqanyn aıtty.