Áleýmettik jeli paıdalanýshylarynyń jolaýshylardy áýe kóligimen tasymaldaý baǵasyna qatysty jazbalaryna baılanysty QR Indýstrıa jáne ınfraqurylymdyq damý mınıstrligi osy tarapta arnaıy taldaý júrgizdi.
Saraptamada otandyq jáne sheteldik avıa tasymaldaýshy kompanıalardyń tarıfteri men baǵa saıasaty qamtyldy, dep habarlaıdy Almaty-akshamy.kz.
Atap aıtqanda, qazaqstandyq Fly Arystan loýkost-áýekompanıasy birneshe baǵyt boıynsha sheteldik áýe kompanıalarymen salystyrǵanda tıimdi baǵa usynatyndyǵy aıqyndaldy. Máselen, Fly Arystan kompanıasynyń 3 594 shaqyrym qashyqtyqty quraıtyn Túrkistan – Stambul baǵytyndaǵy 2022 jyldyń 6 qyrkúıegindegi bılet quny 86 482 teńge bolsa, atalǵan qashyqtyqtaǵy Turkish Airlines kompanıasynyń Nur-Sultan – Antalıa baǵytyndaǵy bıylǵy 1 qyrkúıektegi bılet baǵasy 286 823 teńge kóleminde.
Sáıkes baǵyt boıynsha qazaqstandyq «Eır Astana» kompanıasynyń aǵymdaǵy jylǵy 1 qyrkúıektegi bılet quny 186 474 teńge mólsherinde. Bul tarıf túrkıalyq áýe tasymaldaýshynyń baǵasymen salystyrǵanda 100 myń teńgege tómen.
Osy rette atap óterligi, barlyq áýe tasymaldaýshy kompanıalar dınamıkalyq baǵa saıasaty júıesin qoldanady. Máselen, erterek brondalǵan bılet quny ushý aldynda alynǵan bılet baǵasynan birneshe ese tómen. Sáıkesinshe, taldaý barysynda túrli avıakompanıalardyń belgili bir datadaǵy tarıfyn salystyrý mańyzdy ról atqarady. Bul naqty ári aıqyn taldaý júrgizýge múmkindik beredi.
Osy tarapta taǵy bir mysal, qashyqtyǵy «Pegasus Airlines» kompanıasynyń 2 690 shaqyrymdy quraıtyn Stokgolm – Antalıa baǵytyndaǵy bıylǵy jyldyń 1 qyrkúıeginde bılet baǵasy 42 302 teńgeni quraıdy.
Taldaý nátıjesi kórsetkendeı, qazaqstandyq avıakompanıalardaǵy bılet quny sheteldik áýe tasymaldaýshylarmen salystyrǵanda tıimdi jáne qoljetimdi. Eń bastysy – sapardy aldyn ala jáne der kezinde josparlaǵan jón.